DILI, 01 juñu 2023 (TATOLI)–Ministériu Solidariedade Sosiál no Inkluzaun (MSSI) planeia ona iha sesta (02/06) ne’e sei halo lansamentu dadus vulnerável, nune’e Governu foun mai bele utiliza dadus hodi fó asisténsia di’ak liu ba sidadaun sira depende ba polítika Governu nian.
“Ho dadus ne’e iha futuru ita bele fó apoia sosiál ba sidadaun sira bazeia ba dadus rejistadu. Se lae ita ba fó apoia de’it maibé laiha dadus loloos hosi kada munisípiu, ne’ebé buat tékniku sira ne’e presiza tau atensaun,” Vise Primeiru-Ministru no Ministra Solidariedade Sosiál no Inkluzaun, Armanda Berta dos Santos, informa hafoin relata serbisu ba Xefe Governu, iha Palásiu Governu, kinta ne’e.
Notísia relevante : MSSI halo levantamentu dadus família vulneravel
Governante ne’e konsidera, dadus ne’e importante hodi ajuda Governu kria planu di’ak no tau atensaun ba sidadaun sira.
“Durante ne’e ministériu rekolla hela dadus kona-ba ema vulnerável iha munisípiu hotu, ne’ebé planeia ona aban (sesta) mak halo lansamentu,” nia akresenta.
Dadus ne’e sei lansa hosi Vise-Ministra Solidariedade Sosiál no Inkluzaun, Signi Chandrawati Verdial, iha salaun MSSI, Caicoli.
Ekipa responsável rekolla dadus ema vulnerável iha territóriu tomak hamutuk 33.000 resin.
Jornalista : Antónia Gusmão
Editora : Julia Chatarina
