DILI, 01 juñu 2023 (TATOLI)—Vise Primeiru-Ministru no Ministra Solidariedade Sosiál no Inkluzaun (MSSI), Armanda Berta dos Santos, informa, ministériu la prevee orsamentu hodi selu reklamante subsídiu fim do ano $200 ba kada uma-kain.
“Konsellu Ministru aprova ona maibé ami hein hela Prezidente Repúblika tanba seidauk promulga, kuandu promulga ita mós laiha orsamentu hodi selu, tanba ne’e presiza orsamentu retifikativu,” Ministra hateten hafoin relata serbisu ba Xefe Governu, iha Palásiu Governu sexta ne’e.
Governante ne’e dehan, tanba Governu atuál mandatu atu hotu ona, espera Governu tuir mai bele rezolve.
“Governu halo ona esforsu mak aprova ona iha Konsellu Ministru maibé Prezidente Repúblika seidauk promulga, entaun ami labele halo buat ida. Governu halo alterasaun hodi nune’e ema ne’ebé seidauk simu bele simu hotu, ne’ebé karik Prezidente promulga mós presiza tan orsamentu hodi selu,” nia akresenta.
Notísia relevante : Tempu badak, Governu halo pagamentu ba reklamante subsídiu $200
Tuir Ministra, la’ós sidadaun baibain de’it mak seidauk simu maibé Xefe suku balun mós seidauk simu no tama iha lista reklamante.
“Laiha orsamentu maibé Governu hakarak selu tanba konsidera sidadaun hotu iha direitu atu hetan,” nia tenik.
Konsellu Ministru foin lalais aprova alterasaun daruak ba dekretu-lei númeru 37/2022, loron 25 maiu, kona-ba subsídiu fim de ano ba uma-kain.
Projetu dekretu-lei ne’ebé aprova iha sorumutuk Konsellu Ministru iha loron 01 fevereiru 2023, define pagamentu ba subsídiu fim de ano sei hala’o hosi novembru 2022 to’o outubru 2023, suspende durante períodu kampaña eleitorál ba Eleisaun Parlamentár.
Nune’e, Konsellu Ministru antes ne’e aprova alterasaun daruak ba dekretu-lei kona-ba subsídiu fim de ano hodi alarga períodu pagamentu to’o abríl 2023.
Iha sorin seluk, MSSI finaliza ona pagamentu subsídiu $200 iha territóriu tomak, iha loron 11 janeiru 2023, maibé mosu reklamante rejistadu hamutuk 28.000 resin.
Totál benefisiáriu ba subsídiu $200 iha territóriu hamutuk 339.954 ho montante osan alokadu ba pagamentu $67.990.800.
Projetu dekretu-lei ne’ebé aprova ona iha sorumutuk Konsellu Ministru iha loron 25 janeiru 2023, define ona diploma ne’e tama iha vigór iha loron 01 juñu.
Jornalista : Antónia Gusmão
Editora : Julia Chatarina
