iklan

NASIONÁL, EKONOMIA, HEADLINE

Governu hein lejizlasaun promulgadu hodi distribui cesta bázika ba reklamante

Governu hein lejizlasaun promulgadu hodi distribui cesta bázika ba reklamante

Ministru Koordenadór Asuntu Ekonómiku, Joaquim Amaral. Imajen Tatoli/Francisco Sony

DILI, 02 juñu 2023 (TATOLI)—VIII Governu Konstitusionál daudaun hein lejizlasaun hodi distribui cesta bázika ba sidadaun sira ne’ebé seidauk simu ka reklamante.

Ministru Koordenadór Asuntu Ekonómiku, Joaquim Amaral, rekoñese presiza konklui distribuisaun cesta bázika ba reklamante sira inklui pagamentu sira.

“Ami-nia ekipa kontinua halo serbisu, utiliza tempu sira halo distribuisaun ba reklamante sira. Konserteza distribuisaun hotu ona no taka ho reklamante, maibé sei iha difikuldade oitoan tanba lejizlasaun seidauk hetan promulgasaun hosi Prezidente Repúblika, entaun presiza hein lai lejizlasaun. Bainhira hetan ona promulgasaun, Governu bele prosesa direitu reklamante,” Ministru Joaquim hateten hafoin relata progresu servisu ba Xefe Ezekutivu, iha Palásiu Governu, sesta ne’e.

Notísia relevante : Distribuisaun sesta bázika estende tan to’o 30 juñu

Governante ne’e dehan, ekipa serbisu tuir kalendáriu, nune’e revizaun diploma ne’e submete ona ba Prezidente Repúblika maibé seidauk simu fali resposta.

“Bainhira laiha, Governu foun mai bele kontinua halo distribuisaun tanba ne’e ligasaun ho ema-nia direitu, katak sira balun simu ona balun seidauk simu, ne’e kestaun tempu de’it, governasaun iha nia kontinuidade, karik labele rezolve iha fulan-ne’e nia laran, tempu sira tuir-mai bele rezolve tanba iha osan, presiza de’it haree oinsá atubele iha ajustamentu ida atu halo distribuisaun,” nia otimista.

Konsellu Ministru Foin lalais deside hodi estende tan distribuisaun to’o 30 juñu tinan ne’e, tanba antes ne’e define ona katak atividade ne’e to’o de’it iha 30 maiu, enkuantu distribuisaun cesta bázika ba família timor-oan sira ne’ebé presiza liu.

Dekretu-lei ba estensaun cesta bázika nian ne’e aprezenta hosi Ministru Koordenadór Asuntu Ekonómiku, Joaquim Amaral, ne’ebé estabelese hosi dekretu-lei númeru 10/2022, loron 04 marsu, ne’ebé aprova ona medida sira ba reforsu distribuisaun cesta bázika ba família sira no apoiu ba operadór ekonómiku lokál sira inklui  kria ona rejime espesiál aprovizionamentu ida ba efeitu, iha ámbitu planu rekuperasaun ekonómika.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!