MALIANA, 02 Juñu 2023 (TATOLI)-Kooperativa Kréditu Uniaun Lakon Nakukun Mosu Naroman (LANAMONA) hahú hosi 2004 to’o fulan ezembru 2022 iha kapitál hamutuk millaun $1,315, 265.06 hosi membru na’in-2.120.
Prezidente LANAMONA, Domingas Barreto, esplika, membru hirak-ne’e mai hosi munisípiu Aileu, Dili, Liquiçá, Ermera no Bobonaro.
Notísia relevante: SEKoop inaugura sede kooperativa kréditu uniaun MHF
“Ami fó kreditu ba membru sira kiik liu $150 no boot liu $10.000. To’o iha fim de dezembru 2022 totál membru hamutuk, 2120 pessoas no kapital millaun $ 1,315, 265.06, osan ne’e hosi kapitál primeiru ami hahú ho $300,” nia informa ba jornalista sira iha Jináziu Maliana, sesta ne’e.
Enkuantu totál empréstimu ne’ebé fó ne’ebé fó ba membru sira hamutuk $93,150.00. Hosi montante devolve ona rihun $36,104,60 no falta rihun $57,045.40.
Kréditu ne’ebé LANAMONA oferese ba membru sira hodi halo kooperativa iha área agrikultura hanesan halo natar, pekuária hakiak fahi, karau no peska hakiak-ikan.
Atuál Depitada PLP iha Parlamentu Nasionál ne’e subliña, objetivu hosi harii kooperativa ne’e eduka membru atu depozita ka rai osan ba futuru, eduka membru halo jestaun osan ho di’ak.
“Atu bele halo redusaun ba kiak no mukit, bele mós halo prevensaun hosi violénsia doméstika, tanba ita haree durante ne’e feto barak mak sai vítima iha sira-nia fámilia,” nia dehan.
Nia dehan, liberta Pátria no mos tenke liberta Povu presiza halo asaun konkreta, hakerek ona iha Konstituisaun RDTL artigu 138 kona-bá setór kooperativa hanesan sosiu-ekonómiku ba dezenvolvimentu sustentável
Ho baze fundamentál ida-ne’e iha fulan-setembru tinan 2004, grupu feto rezisténsia (OMT) ema na’in-13 organiza aan forma grupu rai osan hamutuk ho kapitál $300 hodi fo empresta ba malu atu fila liman, nune’e bele atende nesesidade iha família uma laran.
Iha loron 19 jullu 2008 liuhosi asembleia jerál grupu ne’e transforma aan ba kréditu Union ho naran: Lakon Nakukun Mosu Naroman (LANAMONA) ho fundadór membru ema na’in-40 ho totál fundu ka kapitál rihun $7.
Assembleia ne’e realiza ho apoia hosi Diresaun Nasional Kooperativa no simu posse ba Estrutura Credit Union LANAMONA hosi Ministru Ekonomia Dezenvolvimento, João Mendes Gonçalves.
Vizaun hoai kooperativa nu’udar instituisaun finanseira atubele kompete ho instituisaun finanseira seluk no bele fo prosperiedade ba membru sira tuir prinsípiu Kooperativa Credit Union nian.
Enkuantu Misaun forma organizasaun LANAMONA ne’ebe prontu serbí membru liuhosi rai no foti osan tuir nesesidade membru idak-idak nian atu nune’e bele kapasita iha dezenvolvimentu setór ekonomia hodi fó prosperiedade ba membru sira.
Notísia relevante: Kooperativa kréditu ualu sei hetan sertifikadu apresiasaun hosi SEKoop
Jornalista: Sérgio da Cruz
Editór: Evaristo Soares Martins
