Suku Tashilin hamosu aktu krime aas iha Covalima
COVALIMA, 02 juñu 2023 (TATOLI)–Komandante Polísia Nasionál Timor-Leste (PNTL) munisípiu Covalima, Superintendente Polísia Basílio de Jesus, hateten suku Tashilin, postu administrativu Zumalai sai grau dahuluk hamosu aktu krime aas iha munisípiu Covalima.
Notísia Relevante: Kazu konfrontu Tashilin, PNTL detein ona suspeitu na’in-ualu
“Ita Covalima iha Postu Administrativu hitu (7), hosi ne’e postu administrativu Zumalai, jerálmente ita foti hanesan primeiru grau aas ho nia aktu krime. Hosi postu Zumalai sei kategoriza hanesan ita foti suku Tashilin sai hanesan primeiru kategoria aktu krime mosu iha tinan rua no tolu ba kotuk,” Superintendente Polísia, Basílio de Jesus hateten ba jornalista-sira, iha Covalima.
Kamandante PNTL ne’e hateten, Covalima iha postu administrativu hitu maibé postu Zumalai sai hanesan grau dahuluk hamosu krime aas ne’e, relasiona ho segunda (29 maiu 2023) madrugada ne’e, membru Grupu Arte Marsiál asalta komunidade iha suku Tashilin hodi estraga motorizada hitu no uma 10.
Tanba, nia dehan, bazeia ba esperénsia ne’ebé iha pasadu hatudu katak ema na’in-rua mate ona no segunda (29 maiu 2023) madrugada ne’e, membru Grupu Arte Marsiál asalta komunidade iha suku Tashilin.
Ho akontesimentu ne’e, halo komunidade Tashilin nia moris ladún seguru, nune’e nia hanesan komadante PNTL munisípiu Covalima estabele kedas postu polísia permanente atu labele fó espasu tan ba autór sira halo krime.
Bazeia ba konstituisaun RDTL artigu 147 hodi ko’alia kona-ba Polísia no forsa seguransa sira-ne’ebé iha alinea 1 hateten Polísia sei defende legalidade demokrátiku no garante sidadaun sira-nia seguransa internu, maibé sira labele iha partidu polítiku.
Alinea 2 hateten, Prevensaun kriminál tenke hala’o ho respeitu ba direitu umanus no iha alinea 3 haktuir Lei mak sei harii rejime ba polísia no mós forsa seguransa seluk.
Tuir dadus ne’ebé Agência Tatoli asesu membru Polísia Nasionál Timor-Leste (PNTL), iha munisípiu Covalima ne’e membru PNTL hamutuk na’in-149 ne’ebé sei garante seguransa ba komunidade iha Covalima.
Notísia Relevante: Ema deskoñesidu asalta no estraga motorizada hitu-uma 10 iha Tashilin
Jornalista : Celestina Teles
Editór : Cancio Ximenes
