DILI, 05 juñu 2023 (TATOLI)–Ekipa avaliasaun independente amerikana, Mercer sei halo avaliasaun ba fundu mina-rai Timor-Leste.
“Relata ba Primeiru-Ministru kona-ba ekipa avaliasaun independente ne’ebé foin dahuluk ita halo ba fundu mina-rai tanba desde ita kria fundu mina-rai iha tinan 2005 to’o agora seidauk halo avaliasaun ruma,” Ministru Finansa, Rui Augusto Gomes, informa hafoin relata progresu serbisu ba Xefe Governu, iha Palásiu Governu, segunda ne’e.
Ministru dehan, avaliasaun ne’e atu haree hosi parte governasaun, investimentu, rekursu, no operasionál.
“Ida-ne’e atu haree ita iha dalan loos ona ka lae, ne’ebé foin atu halo hosi empreza Mercer hosi Singapura, empreza ida-ne’e amerikana, tinan 70 resin tiha ona, sira-nia ramu iha fatin-fatin maibé sira ne’ebé mai ne’e hosi Singapura,” Ministru tenik.
Notísia relevante : Retornu fundu mina-rai pozitivu iha trimestre dahuluk 2023
Ekipa sira ne’e iha ona Dili no hahú segunda (05/06) to’o sesta (09/06) sira sei halo avaliasaun ba fundu mina-rai, nun’e to’o agostu 2023 Governu bele hetan relatóriu avaliasaun.
Ekipa ne’ebé sei envolve iha avaliasaun ne’e mak Ministériu Finansa sei superviziona ein termu polítika no Banku Sentrál Timor-Leste (BCTL, sigla portugés) nu’udar jestór operasionál.
Bazeia ba relatóriu trimestrál fundu mina-rai ne’ebé termina iha loron 31 marsu 2023, hatudu katak kapitál fundu iha trimestre dahuluk ne’e atinje billaun $17,832, kompara ho trimestre ikus 2022, iha billaun $17,141.
Jornalista : Antónia Gusmão
Editora : Julia Chatarina
