iklan

EKONOMIA, HEADLINE

MOP hetan empréstimu no grant millaun $492,2 durante mandatu VIII Governu

MOP hetan empréstimu no grant millaun $492,2 durante mandatu VIII Governu

Jardín B.J. Habibie. Imajen Tatoli/Egas Cristóvão

DILI, 13 juñu 2023 (TATOLI)Ministériu Obra Públika (MOP) hetan ona empréstimu no grant hamutuk millaun $492,2 hodi finansia konstrusaun fízika sira no servisu konsultóriu ba supervizaun durante mandatu VIII Governu Konstitusionál.

Tuir relatóriu dezempeñu servisu MOP nian ne’ebé Agência Tatoli asesu, tersa ne’e, orsamentu millaun $492,2 ne’ebé MOP jere hodi finansia projetu hamutuk 16, ne’ebé hosi projetu ne’e, sia kompleta ona 100%, haat iha defect liability period no tolu on going hela ho nia progresu liu ona 50%.

Iha termu fonte finansiamentu, projetu hitu finansiadu hosi Banku Dezenvolvimentu Aziátiku (ADB, sigla inlgés), haat finansiadu hosi Banku Mundiál, ida finansiadu hosi Japanese International Cooperation Agency(JICA), ida finansiadu hosi ADB no JICA inklui projetu tolu finansiadu hosi Uniaun Europeia (UA) no ADB.

Notísia relevante : Banku Mundiál sei fó empréstimu millaun $50 ba TL hodi harii ospitál tolu

Tinan 2023, MOP mós sei ezekuta tan projetu hitu, ne’ebé fonte finansiamentu sei mai hosi Banku Mundiál no ABD.

Hosi projetu hitu ne’e, daudaun projetu lima mak iha prosesu aprovizionamentu hanesan ponte tolu iha Baucau-Lospalos, estrada Lospalos-Iliomar, Viqueque-Natarbora, Jct Hatubilico-Letefoho, no Letefoho-Gleno, inklui projetu rua seluk hanesan estrada Lautém-Com no Lautém-Lospalos sei hein hela loan agreement.

Progresu servisu intervensaun ba normalizasaun no reabilitasaun infraestrutura afetada hosi kalamidade 04 abríl 2021, bazeia ba despaixu hosi Primeiru-Ministru númeru 046 alteradu ba númeru 057 ne’ebé kria Ekipa Task Force ho ninia kompeténsia tomak, MOP konsege halo ona projetu hamutuk pakote 44, ne’ebé 26 mai hosi liña ministeriál no 18 mai hosi fundu insfraestrutura.

Iha mós projetu 15 mak tama ona iha prosesu aprovizionamentu no 47 iha dezeñu ne’ebé halo hosi ekipa Ad-Hoc MOP nian.

Ba abitasaun no projetu interministeriál nian, MOP hahú halo estudu no dezeñu ba projetu abitasaun asesível (affordable housing) ne’ebé ho planu inisiál unidade 4.000 maibé haree ba limitasaun rekursu hamenus ba unidade 2.000 tama ba programa Parseria Públiku Privada (PPP) ne’ebé servisu hamutuk ho IFC, Ministériu Finansa, Ministériu Justisa no ministériu relevante sira seluk atu harii Uma Kbiit Laek iha rai Halidolar Hera, ne’ebé rai ne’e hetan ona koñesimentu hosi Terra no Propriedade iha tinan 2019.

Enkuantu, projetu sira ne’ebé tama iha estudu viabilidade mak hanesan projetu enjeñaria no arkitetura Ospitál Dr. António Carvalho Lahane tama ona iha relatóriu finál ho nia montante orsamentu hodi halo estudu hamutuk $375.986,35.

Nune’e, projetu estudu viabilidade no planu mestre ba Hospital Nacional Guido Valadares (HNGV) nian tama ona iha faze aprovasaun ba relatóriu finál no pagamentu ba relatóriu finál ho montante $341.781.

Kona-ba projetu enjiñaria no arkitetura Sidade Universitária Aileu inklui ho nia estudu viabilidade finaliza ona no daudaun iha faze preparasaun DED hamutuk ho estudu ba projetu ho totál orsamentu $475.000.

Enkuantu, estudu viabilidade ba zona dezignada dezenvolvimentu Baucau no Batugade ramata ona ninia relatóriu finál ho ninia rekomendasaun sira, ho objetivu prinsipál projetu maka atu diversifika ekonomia nasaun, kriasaun empregu no hamenus kiak, ne’ebé orsamentu halo estudu ba projetu hamutuk $281.415,92.

Estudu revitalizasaun ba zona Aitarak-Laran ho nia objetivu atu revitaliza abitasaun liuhosi kriasaun parke ka re-organizasaun abitasaun. Projetu ida-ne’e daudaun sei iha faze estudu ho orsamentu totál $399.974,60.

Kona-ba projetu konstrusaun jardín 2006 Caicoli Dili asina ona kontratu ho empreza manán-na’in Rileru Unip. Lda no daudaun iha faze implementasaun, ne’ebé obra sei ramata iha tinan 2023, ho totál orsamentu $3.171.957,80 ho ninia objetivu atu aumenta área verde hodi nune’e bele hamenus polusaun iha sidade laran.

Nune’e, kona-ba projetu kria liña bisikleta hosi ponte BJ. Habibie to’o Cristo Rei ho objetivu atu halo melloramentu trotoar no hasa’e kondisaun seguransa ba utilizadór bisikleta liuhosi faze konstrusaun iha área turizmu kostal sidade Dili nian ho naruk kilómetru 4,9. Projetu ne’e daudaun sei iha faze kompleta dokumentu hodi kumpre rekezitu hosi Ajénsia Dezenvolvimentu Nasionál (ADN) nian, liu-liu iha dezeñu no BOQ.

Aleinde ne’e, iha mós estudu kona-ba Land Pooling or Readjustment (LPR), ne’ebé atu identifika kondisaun ezistente iha área degradadu, hamosu konseitu diretiva reajustamentu ba área urbana ne’ebé mak abitável, nune’e bele kria área rezidénsia urbana ne’ebé mak ordenada, organizada, no planeadu hanesan parte ida hosi área urbana.

Kona-ba ida-ne’e, estudu prelimináriu projetu ne’e halo hotu ona no daudaun tama iha faze preparasaun Term of Reference (TOR) no prosesu konkursu públiku ho totál orsamentu ba projetu ida ne’e hamutuk $200.000.

Projetu konstrusaun koredór verde Avenida Nicolau Lobato Timor Lodge nia oin  daudaun projetu ne’e iha faze konstrusaun no obra sei ramata iha tinan 2023 ho totál orsamentu $269.929,38, ho objetivu hosi projetu ne’e mak atu aumenta área verde no redús poluisaun iha sidade laran.

Kona-ba projetu konstrusaun jardín Motael iha Komisaun Nasionál Antí-Korrupsaun (CAC, sigla portugés) nia oin ho montante orsamentu $422.365,01, ne’ebé daudaun prosesu konstrusaun la’o hela no obra sei ramata iha tinan 2023. Objetivu hosi projetu ne’e mak atu mellora jardín Farol nune’e bele fó estétika ne’ebé furak ba sidade Dili.

Projetu konstrusaun jardín Toleránsia, Kampung Alor SAMES nia oin ho montante orsamentu $268.890,38, daudaun prosesu konstrusaun la’o hela no obra sei ramata iha tinan 2023.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!