iklan

HEADLINE, SAÚDE

Banku Mundiál sei fó empréstimu millaun $50 ba TL hodi harii ospitál tolu

Banku Mundiál sei fó empréstimu millaun $50 ba TL hodi harii ospitál tolu

Logotipu Banku Mundiál

DILI, 11 maiu 2023 (TATOLI) – Diretór Jerál Servisu Koorporativu iha Ministériu Saúde , Marcelo Amaral, hateten Banku Mundiál sei fó empréstimu ho millaun $50 ba Governu Timor-Leste hodi harii ospitál munisipál tolu.

“Ida ne’e la’ós fundu, maibé ida ne’e mepréstimu ne’ebé husi Banku Mundiál ba Governu Timor-Leste, entaun ida ne’e iha ona prosesu negosiasaun nia-laran no Governu sei asina hamutuk ho Banku Mundiál iha tempu badak”, Marcelo Amaral informa, ohin.

Nia hateten, negosiasaun ka diskusaun ba leventamentu lao hotu ona, hein de’it desizaun finál hodi ezekuta, ida ne’e atu bele konstrui ospitál iha Gleno, Ermera, ospitál iha Lautem no mós ospitál iha Viqueque. Purtantu, ospitál munisipál tolu mak sei konstrui hodi utiliza fundu ida ne’e.

“Atu harii ospitál iha munisípiu tolu, ita mós inklui hodi atualiza sentru saúde, postu saúde iha munisípiu tolu ne’e, karik projetu ida ne’e aprova husi Governu, mak ita sei asina akordu ho Banku Mundiál no sei implementa”, nia espera.

Ezekutivu ne’e afirma, agora daudaun prosesu negosiasaun hotu ona no iha prosesu atu prepara ba asina, maibé tenke haruka uluk ba Camara de Contas hodi halo verifikasaun atu bele hetan aseitasaun.

“Ita bele asina ona, maibé ida ne’e entre Ministériu Finansas ho Banku Mundiál, maibé MS bainhira asina bele ezekua projetu ne’e, entaun proposta ne’ebé mak agora elobaora ne’e hamutuk millaun $50”, nia esplika.

“Iha fatin hanesan Country Representative Banku Mundiál iha Timor Leste, Bernard Harbour dehan enkontru ofisiál ho MS ne’e atu ko’alia kona-ba investimentu boot ba setór saúde nian.

“Ami ko’alia kona-ba investimentu orsamentu totál millaun $50, atu investe ba ospitál tolu no mós atu apoiu hotu ba ospitál rua iha Dili laran”, nia subliña.

Nia informa, kompromisu orsamentu millaun $50 ne’e ba tinan lima hodi investe ba konstrusaun ospitál tolu, atu halo reabilitasaun ba sentru saúde no postu saúde no mós sosa ekipamentu ba ospitál Lahane no ekipamentu ba Hospitál Nasionál Guido Valadares (HNGV).

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!