DILI, 14 juñu 2023 (TATOLI)—Ministériu Agrikultura no Peska (MAP) liuhosi Diresaun Jerál Kooperasaun no Dezenvolvimentu Institusionál, planeia aloka $60.000 tinan ne’e ba grupu agro-komérsiu iha área Raitahu, postu administrativu Viqueque, munisípiu Viqueque hodi hala’o atividade ortikultura.
Diretór Nasionál Agro-Komérsiu no Kooperasaun iha Setór Privadu, Fernando Egidio Amaral, hateten, MAP apoia orsamentu boot liu ba grupu agro-komérsiu iha Raitahu entre grupu no asosiasaun sira seluk, liuhosi orssamentu transferénsia públika.
“Grupu apoiu asosiasaun ne’ebé ita apoiu boot liu mak transferénsia públika iha Raitahu ne’ebé antes ne’e ita apoiu pakote dala-ida ba atividade ortikultura hamutuk $650.000 iha tinan 2022 no ita tau tan $25.000. Tinan ida-ne’e planu atu tau tan $60.000 maibé iha hela prosesu,” Diretór informa ba Agência Tatoli liuhosi entrevista eskluziva iha estúdiu Farol, foin lalais ne’e.
Notísia relevante : Sentru agro-komérsiu Raitahu rekolla ona rendimentu $6.400
Nia dehan, MAP aloka orsamentu ba agro-komérsiu iha Raitahu hodi hala’o atividade ortikultura hanesan kuda melánsia, pateka, tomate, brinjela, ai-manas, fore-mungu, fore-keli, modo- tahan, no seluk tan.
“Atividade ortikula iha Raitahu nia rezultadu la’o di’ak no produtu hirak ne’e sei hamata bá iha loja agrikultór sira iha Dili laran no balun fa’an ba komunidade iha Viqueque,” nia akresenta.
Atividade ne’ebé halo iha Raitahu, aleinde ortikula, iha parte pekuária hakiak ikan iha kolam 14, hakiak manu broiller, revitalizasaun nuu no atividade seluk tan.
“Atividade hakiak manu ne’e naton ita apoia osan $21.000. Antes ne’e manu broiller hahú fa’an ona bá merkadu. Ita hakarak kada tinan manu broiller hasai hosi fatin ne’ebá 150.000 hodi distribui no sustenta merkadu. Ida-ne’e hanoin no planu di’ak, espera iha futuru mai bele realiza. Ba produtu sira seluk hanesan modo tahan fore-mungu no seluk tan bainhira sira prodús no iha rezultadu ona mak fó hatene MAP ho karreta ba tula mai tau iha loja agrikultór sira iha Dili laran,” Diretór informa.
Jornalista : Arminda Fonseca
Editora : Julia Chatarina
