PPN enkontru ho partidu asentu parlamentár ko’alia kona-ba pose Deputadu foun
DILI, 15 juñu 2023 (TATOLI)—Prezidente Parlamentu Nasionál, Aniceto Longuinhos Guterres Lopes, kinta ne’e, hala’o enkontru ho reprezentante partidu asentu parlamentár lima iha lejislatura daneen hanesan CNRT, FRETILIN, PD, KHUNTO ho PLP hodi ko’alia kona-ba pose ba Deputadu foun.
Notísia Relevante: PPN deside plenária dahuluk ba lejislatura daneen iha 22 juñu
“Enkontru ida-ne’e Prezidente Parlamentu Nasionál mak ohin hala’o iha reuniaun ida ho líder partidu polítiku sira-ne’ebé iha asentu parlamentár lejislatura daneen nian, konserteza ida-ne’e liga ho asuntu ba chegada novo Deputadu ba lejislatura daneen,” Sekretáriu Adjuntu Parlamentu Nasionál (PN), João Rui Amaral, hateten ba jornalista sira iha PN.
Nia hateten hosi parte sekretariadu, jerál ninia preparasaun tékniku preparadu dezde antes eleisaun parlamentár ba sesimónia pose Deputadu foun iha lejislatura daneen ne’ebé sei hala’o iha 22 juñu 2023.
Guiaun no sekuénsia atu simu Deputadu foun iha hotu ona no durante enkontru ho reprezentante partidu polítiku sira-ne’e hodi fó apresiasaun aseita ona mak ida-ne’e sei utiliza.
Sekuénsia programa ne’ebé sei halo reuniaun plenária dahuluk ba lejislatura daneen nian ne’e, sei hala’o iha loron 22 juñu 2023, no loron tuir mai eleisaun ba kanditadu Prezidente Parlamentu Nasionál no ho ajenda sira seluk tan.
Sekretariadu Jerál Parlamentu Nasionál (PN) sei hasai konvite ba líder partidu polítiku ne’ebé hetan asentu parlamentár, konvida mós entidade balun hanesan korpu diplomátiku balun no eis Deputadu sira.
Nia hateten, sekretariadu jerál PN prevee orsamentu rihun $16 hodi atende serimónia pose Deputadu foun maibé orsamentu ne’e sei atende atividade Parlamentu Nasionál nian ne’ebé prevee to’o iha fulan-setembru tinan ne’e.
Notísia Relevante: PN halo preparasaun másimu ba pose Deputadu foun
Jornalista : Nelson de Sousa
Editór : Cancio Ximenes
