Ohin, PN hasai konvite ba Deputadu foun partisipa plenária dahuluk lejislatura daneen
DILI, 16 junu 2023 (TATOLI)—Parlamentu Nasionál (PN), sesta ne’e, hasai ona konvite ba Deputadu foun ba lejislatura daneen hamutuk 65 hosi partidu ne’ebe hetan asentu parlamentár hanesan CNRT, FRETILIN, PD, KHUNTO ho PLP hodi bele partisipa iha reuniaun plenária dahuluk ba lejislatura daneen iha loron 22 juñu 2023.
Notisia Relavante: PPN enkontru ho partidu asentu parlamentár ko’alia kona-ba pose Deputadu foun
“Ohin, sesta-feira hasai ona konvite ba Deputadu foun ba lejislatura daneen ho ajenda sira hasai hotu ona,” Prezidente Parlamentu Nasionál (PPN), Aniceto Longinhos Guterres Lopes, hateten ba jornalista sira iha uma fukum Parlamentu Nasionál.
Prezidente PN ne’e hateten, daudaun ne’e prepara hela relatóriu no sei iha prosesu nia laran ne’ebé nia-parte seida’uk bele fó sai relatóriu ne’e kona-ba dezempeñu serbisu durantu mandatu ho rekomendasaun sira.
“Ita-boot sira (jornalista) durante ne’e akompaña nia dezempeñu halo oinsá la presiza ha’u ko’alia ba akompaña no relatóriu sei hasai ba públiku, tarde liu iha 21 juñu ne’e, relatóriu ne’e fó sai ona. Maibé, ha’u só bele halo de’it relatóriu kona-ba ha’u-nia mandatu se hahú iha 20 maiu 2020 mai to’o 22 juñu 2023,” nia hateten.
Enkuantu, iha loron 19 fulan-juñu ne’e sei iha reuniaun plenária ikus ba Deputadu lejislatura dalimak.
Notisia Relevant: Deputadu foun tenke dignifika PN no sai defensór ba povu
Jornalista : Nelson de Sousa
Editór : Cancio Ximenes
