PN hato’o votu pezár ba falesimentu Isabel Ferreira ho Luis Lobato

DILI, 19 juñu 2023 (TATOLI)—Parlamentu Nasionál (PN), segunda ne’e, liuhosi reuniaun plenária aprova votu pezár ba falesimentu espoza Primeiru-Ministru (PM), Isabel Ferreira, no eis Vise Ministru Saúde, Saudozu Luis Lobato, ne’ebé hakotu iis iha loron 18 fulan-juñu tinan 2023 hodi hato’o profunda kondolénsia ba matebian no família.

Notísia Relevante: Kankru Intestinu habadak viajen Isabel Ferreira iha mundu

“Votu númeru 15/V falesimentu Isabel Ferreira ho rezutadu votu a-favór 52, kontra no abstensaun 0, nune’evotu númeru 16/v pezár falesimentu Luis Lobato ho rezultadu votasaun a-favór 44, kontra no abstensaun 0, ho ida-ne’e aprovadu,” Prezidente Parlamentu Nasionál, Aniceto Longuinhos Guterres Lopes, hateten iha sala plenária PN.

Prezidente PN fó sai katak, parte delegasaun PN hafoin plenária ramata sei ba presta omenajen ba matebian iha nia rezidénsia Metiaut.

Tuir textu votu pezár ne’ebé sekretária meza lee sai katak durante tempu naruk iha karreira profisionál matebian envolve ativu kestaun direitu umanu, asume papel lideransa iha organizasaun naun-governamentál, entre iha tinan 1998-1999 exerse funsaun hanesan koordenadora jerál ONG Kontras Timur-Timur no diretora komisaun diretu umanu Timor-Leste, no iha 2001 eleitu membru asembleia konstituiente reprezenta UDT, iha faze administrasaun tranzitóriu nasaun unida nu’udar konsultora direitu umanu iha Governu daruak tranzisaun Timor-Leste.

Hafoin restaurasaun indepedénsia, Isabel Ferreira responsavél kargu barak hanesan umanitáriu, direitu umanu no polítiku nomeadamente vise prezidente kruz vermella Timor-Leste iha 2002-2005, asesora direitu umanu ba Primeiru-Ministru iha 2001-2006, vise ministra justisa iha 2006, membru komisaun verdade no amizade iha 2005-2008.

Hafoin finaliza serbisu iha Komisaun verdade bo Amizade (CVA, sigla portugés), Isabel Ferreira ezerse funsaun relasiona ho promosaun ajente PNTL, komisáriu funsaun públika iha 2011-2014 no asesór jurídiku sekretáriu estadu seguransa iha 2009, asesora jurídika Ministéiru Interiór, konsilleira Ministéiru Edukasaun no advogadu ba labarik.

Paralelamente, matebian lidera organizasaun barak iha organizasaun naun-governamentál ba apoiu populasaun ne’ebé ki’ak no vuneravél destaka iha fundasaun sentru Quesadhip Ruak ne’ebé atua iha área edukasaun, saúde, justisa no edukasaun sívika ho kontribuisaun sira seluk tan.

PN liu expresa votu pezár ba falesimentu Isabel Ximenes no aprezenta sentidu kondolénsia Taur Matan Ruak ho oan na’in-tolu, no Partidu Libertasaun Populár (PLP) no família enlutada.

Deputadu proponente ba votu pezár ne’e aprezenta hosi Domingas dos Santos (PLP), Olinda Guterres (KHUNTO), David Dias Ximenes ‘Mandati’ (FRETILIN), António da Conceição (PD), Virgina Anabelo no Veneranda Lemos (CNRT).

Notísia Relevante: Xanana hato’o sentidu kondolénsia ba falesimentu Luís Lobato no Isabel Ferreira

Deputada Domingas dos Santos hateten, nia-parte subskreve ba votu pezár ne’e tanba nia koñese di’ak matebian iha tempu rezisténsia.

“Nia mós iha koordenasaun di’ak ho ami sira iha munisípiu iha tempu rezisténsia ninian. Nia liberta duni ami-nia joven na’in hira ne’ebé ho organizasaun ONG Kontras, ha’u rasik telefone atu salva joven na’in-10 hela iha igreja, dona Isabel ho dona Olandina tuku 01h00 kalan to’o iha Maliana husu lisense iha KODIM lori joven sira-ne’e fila mai duni iha Dili. Iha mós serbisu seluk ne’ebé iha tempu rezisténsia ami sempre halo koordenasaun di’ak ho matebian no sira seluk. Ha’u hanoin merese duni sentidu kondolénsia no husu harohan ba Nai Maromak atu bele hara’ik perdaun ba nia sala no nia bele hetan moris rohan la’ek iha reinu lalehan,” nia hateten.

Deputada Olinda Guterres hateten, matebian fó ona kontribui mós iha tempu rezisténsia hodi salva timoroan sira-ne’ebé hetan kastigu iha tempu okupasaun Indonézia.

“Ha’u sei hanoin kona, ih 10 outubru tinan 1984, ha’u lees bandeira Merah Putih, ema dadur ha’u ba-mai. Iha ne’e, ema -ne’ebé vizita ha’u iha kadeia laran mak Dom Carlos Filipe Ximenes Belo no dona Isabel Ferreira no mós mana Olandina Caiero. Ida-ne’e mak iha tempu ne’eba, data hau la hanoin hetan ona, maibé ajuda ami barak inklui ajuda joven sira seluk. Tanba ne’e, ohin, ha’u sai proponent, ha’u hatene buat barak hosi dona Isabel,” nia dehan.

Xefe bankada FRETILIN, Deputadu David Dias Ximenes ‘Mandati’, lori bankada nia naran hato’o sentidu kondolénsia ba Isabel Ximenes no família, no mós hato’o sentidu profundu kondolénsia ba saudozu Luis Lobato ho família.

Xefe Bankada CNRT, Deputadu Duarte Nunes, lori bankada nia naran mós hato’o sentidu kondolénsia ba Isabel Ximenes no família, no mós hato’o sentidu profundu kondolénsia ba saudozu Luis Lobato ho família, no husu timoaoan hotu reza hodi sira bele hetan fatin di’ak iha Na’in Maromak nia kadunan santu.

Deputadu PD, António da Conceição ‘kalohan’, lori bankada PD hato’o sentidu profundu komdolénsia ba matebian na’in-rua.

Deputadu Fretilin, José Agostinho Sequeira ‘Somotxo, ne’ebé sai proponente ba povu pezár númeru 16/V, hateten sente triste ho falesimentu no merese fó povu pezár tanba saudozu kontribui iha tempu rezisténsia partisipasaun no dedikasaun iha funu libertasaun.

Notísia Relevante: Luis Lobato fila ona ba mundu seluk

Jornalista : Nelson de Sousa

Editór       : Cancio Ximenes