iklan

EKONOMIA, HEADLINE

Governu lansa relatóriu finál hosi KIDT

Governu lansa relatóriu finál hosi KIDT

Membru Governu no entidade relevante seluk lansa relatóriu anuál daruak junu 2023 hosi KIDT, iha salaun MNEK, Praia dos Coqueiros, tersa (20/06/2023). Imajen Tatoli /Egas Cristóvão

DILI, 20 juñu 2023 (TATOLI)—Governu liuhosi Ministériu Koordenadór Asuntu Ekonómiku (MKAE), Ministériu Turizmu Komérsiu no Indústria (MTKI), Ministériu Obra Públika (MOP) hamutuk ho parseiru dezenvolvimentu sira, tersa ne’e, lansa relatóriu anuaá daruak finál hosi Komisaun Inter-Ministeriál ba Dezenvolvimentu Turizmu (KIDT).

“Relatóriu anuál finál ne’ebé ohin ita lansa ne’e liña koordenasaun di’ak tebes ho instituisaun relevantes sira, Ministériu Turizmu Komérsiu no Indústria konsege prodús ona Planu Estratéjiku Dezenvolvimentu Turizmu (PEDT) 2023-2030 hanesan mata-dalan ba prosesu dezenvolvimentu nasionál iha setór turizmu nian,” Ministru Koordenadór Asuntu Ekonómiku, Joaquim Amaral, hateten liuhosi nia diskursu iha salaun reuniaun Institutu Estadu Diplomátiku iha Ministériu Negósiu Estranjeiru no Kooperasaun (MNEK), iha Praia dos Coqueiros.

Relatóriu ne’e kobre hosi juñu 2022 to’o juñu 2023, hanesan relatóriu ikus hosi KIDT ne’ebé mai hosi mandatu VIII Governu Konstitusionál.

Maski durante ne’e iha limitasaun no dezafiu oin-oin, maibé VIII Governu Konstitusional liuhosi KIDT nia papél halo ona esforsu tomak hodi bele halo programa prioridade ho nia progresu iha área turizmu hanesan setór alternativa ida atubele kontinua diversifika ekonomia nasionál.

Notísia relevante : MTKI lansa livru planu estratéjiku nasionál ba dezenvolvimentu turizmu 2023-2030

Nune’e, atubele iha kontinuasaun hodi bele hatuur loloos sustentabilidade iha área ne’e, maka KIDT estabelese ona jestaun liña koordenasaun hosi nível ministeriál, sekretariu Estadu, tékniku sira, parseiru dezenvolvimentu, setór privadu inklui parseiru sira.

Nune’e, Hanesan Ministru ne’ebé prezide KIDT, Joaquim Amaral hakarak hato’o agradesimentu ba Primeiru Ministru, Taur Matan Ruak, ne’ebé fó ona apoiu tomak ba KIDT durante nia mandatu.

“Apresia Ministru Turizmu Komérsiu no Indústria ho Vise-Ministra Turizmu Komunitáriu no Kultura, ba kolaborasaun di’ak durante ne’e, ha’u mos hakarak kongratula membru KIDT no nia Umidade Tékniku (UT) ne’ebé halo ona sira-nia knaar tuir despaixu PM nian, ne’ebé konsege halo ona progresu no atinjimentu durante períodu ida-ne’e. Relatóriu sira ne’ebé ohin lansa hanesan giaun ida ba membru foun sira hodi bele kontinua,” nia akresenta.

Hosi relatóriu KIDT, progresu no atinjimentu sira mak halo alterasaun ba despaixu PM númeru 024/PM/VI/2019 ho depaixu PM númeru 078/PM/VII/2022 hodi aumenta instituisaun prinsipál sira iha Governu hamutuk neen hanesan Ministru Finansa (MF), Ministériu Justisa (MJ) Ministériu Administrasaun Estatál (MAE), MOP, Ministériu Agrikultura no Peska (MAP) Ministériu Negósiu Estranjeiru no Kooperasaun (MNEK).

Transferénsia ofisiál sítiu turístiku

Kontinua liuhosi liña koordenasaun hamutuk MKAE, MTKI no Sekretaria Estadu Formasaun Profisionál no Empregu (SEFOPE) konsege halo transferénsia  ofisiál sítiu turístiku sira (turizmu komunitária) balun hosi SEFOPE ba MTKI maka hanesan, Com, postu Parlamentu, munisípiu Lautém, Weluli iha Waimori, postu Viqueque, minisípiu Viqueque, One Dollar Beach iha Uma Caduac, minisípiu Manatuto, no Seloi Malere iha minisípiu Aileu sei intrega iha tempu badak.

Liuhosi diskusaun téknika kompreensivu ho liña miniteriál no parseiru sira konsege finaliza PEDT no aprova hosi Konsellu Ministru, ne’ebé ofidialmente MTKI halo ona lansamantu iha loron 15 maiu 2023.

Aleinde ne’e, liuhosi koordenasaun intensivu MKAE, MNEK, MTKI, ministériu relevante, setór privadu no perseiru dezenvolvimentu liuliu USAID-TFA no Banku Mundiál konsege prepara proposta lejislasaun ida ba Konsellu Turizmu ka Tourism Board no seluk tan.

Hosi relatóriu ne’e, dezafiu sira mak hanesan membru KIDT balun ladún iha partisipasaun másimu no atende iha reuniaun KIDT, ladun iha partisipasaun intensivu hosi membru Unidade Tékniku hanesan pontu fókál hosi kada instituisaun Governu ne’ebé dezignadu ona hosi sira-nia superiór ka Ministériu ka Sekretariu Estadu sira.

Dezafiu seluk mak seidauk iha planu asaun anuál 2023 hodi bele define loloos prioridade hosi PEDT 2023-2030, atu nune’e bele koordena no halo ajustamentu programa hosi instituisaun Govemu nian no parseiru sira hanesan setór privadu sira.

Liña instituisaun Governu seidauk bele halo aliñamentu didi’ak sira-nia programa ba orsamentu sira tuir planu anual liuliu planu anual 2023 ne’ebé defini ona hosi PEDT, no seluk tan.

“Hosi relatóriu ne’e, rekomendasaun mak tinan Orsamentu Jerál Estadu (OJE) 2023 presiza aloka orsamentu iha servisu sekretariadu hodi halo koordenasaun no atividade sira iha Komisaun Inter-Ministerial ba Dezenvolvimentu Turizmu. Presiza tebes iha partisipasaun ativu hosi membru Governu sira ne’ebé inklui ona iha membru KIDT tuir despaixu Primeiru Ministru,” nia tenik.

Tanba membru Govemu sira liu-liu membru KIDT nia papél importante tebes hodi halo polítika no dezizaun ba asuntu pertinente no prioridade sira ba dezenvolvimentu turizmu.

“Despaixu Primeiru Ministru kona-ba KIDT mós mensiona katak presiza apoiu hosi ita-nia parseiru dezenvolvimentu sira, tanba ne’e duni sekretariadu sujere hodi KIDT bele deside hodi husu asesór tékniku iha área jurídiku no área peritu turizmu atu apoiu no ajuda UT nia serbisu,” Ministru tenik.

Rekomendasaun seluk mak presiza konvida regulár setór privadu sira-nia reprezentante sira hodi halo diskusaun ho konsulta kona-ba polítika Governu iha área turizmu, liuliu PEDT nian no seluk tan.

Ministru José Lucas hato’o apresiasan

Iha fatin hanesan, Ministru Komérsiu no Indústria, José Lucas do Carmo, hakarak hato’o apresiasaun ba apoiu servisu hamutuk, hosi membru Komisaun Inter-Ministeriál ba dezenvolvimentu turizmu durante ne’e tanba maski tempu badak maibé hetan susesu iha servisu tomak.

“Ita orgullu ba susesu tomak ne’e, maibé presiza konsiente nafatin katak Timor-Leste nu’udar destinu turístiku foun no ladun koñesidu iha merkadu mundiál. Ko’alia kona-ba kondisaun turizmu Timor-Leste ida ne’e, hatodan liutan ho situasaun no presaun boot rua mak hanesan, instabilidade polítika governativa Timor-Leste iha 2017 to’o 2020, no krize pandemia COVID-19 iha 2020 – 2022, ne’ebé Estadu hotu-hotu iha mundu tomak aplika polítika serka sanitária no Lockdown totál, nune’e bandu movimentu ema atu halo viajen no limita aviaun no ró sira atu halo viajem turístika inkluidu mai Timor-Leste,” nia saleinta.

Maibé Governu Timor-Leste liuhosi MTKI hamutuk ho ekipa espesialista turizmu, komisaun no ekipa téknika interministeriál ba dezenvolvimentu turizmu no parseirsu dezenvolvimentu rejista susesu lubuk ida hosi esforsu koletivu ba dezenvolvimentu setór turizmu ne’ebé forte no fundamentál hahú hosi dezenvolvimentu institusionál no marketing nu’udar prioridade boot tebes.

“Dezenvolvimentu institusional ne’ebé foka liu ba prepara enkuadramentu legál mak hanesan, matadalan nasional dezenvolvimentu turizmu komunitáriu ne’ebé aprovadu hosi MTKI loron 16 setembru 2021. Planu Estratéjiku Nasionál Dezenvolvimentu Turizmu 2023-2030, ne’ebé hatur iha rezolusaun Governu númeru 16/2023, 12 abril 2023, kompostu hosi vetór 11, área prioritária 53, atividade prioritária 100 no planu asaun.

“Aleinde ne’e, dekretu lei númeru 27/2023, 31 maiu, kria Autoridade Turizmu Timor-Leste no aprova ho nia estatutu sira, no dekretu lei númeru 28/2023, 31 maio, baze atividade turístika. Enkuantu enkuadramentu legál balun ne’ebé sei iha procesu elaborasaun no aprezentasaun iha Konsellu Ministru no nivel inter-Ministerial, mak hanesan, deretu lei fundu turizmu, dekretu lei jejime jurídiku kona-ba prosedimentu lisensiamentu setorial atividade turístika, taxa no respetiva infrasaun,” Ministru adianta.

Nune’e, dekretu-lei klasifikasaun otél sira no alojamentu inklui servisu turístiku sira, rejime jurídiku sítiu turístiku, rejime jurídiku kon-aba investimentu pouzada, rejime jurídiku kona-ba investimentu Food Court no seluk tan.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!