DILI, 22 juñu 2023 (TATOLI)— Durante fulan maiu Servisu Saúde Ainaro rejista kazu dengue na’in ida, Diretór Servisu Saúde Ainaro, Agostinho da Costa, informa.
“Dengue daudaun ne’e ami rejistu ida maibé ida ne’e importa mai husi Dili la’ós hela iha Ainaro signifika sira hela iha Dili depois fila mai foho mak sintoma mosu,” Agostinho da Costa ba TATOLI via telefónika ohin.
Diretór Servisu Saúde Ainaro dehan, moras dengue ne’e afeta ema idade 14 ne’ebé mak mai husi Munisípiu Dili.
“Durante iha Ainaro husi fulan janeiru to’o maiu ita seidauk rejista kazu dengue, tanba kazu ne’ebé daudaun iha ne’e mai husi Dili entaun ami nafatin halo sosializasaun másimu ba populasaun sira Ainaro kona-ba prevensaun dengue,” nia hateten.
Ezekutivu ne’e afirma, durante ne’e Servisu Saúde Ainaro halao servisu másimu hodi prevene moras dengue ida ne’e tanba ekipa sira nafatin la’o tama sai bairru hodi halo sosializasaun no fahe informasaun ba komunidae relasiona ho kazu dengue.
“Kona ba tratamentu ita-nia médiku rasik fó asisténsia ida ne’ebé mak diak to’o rekupera fila ba uma,” nia relata.
Servisu Saúde Ainaro rasik daudaun ne’e estoke abate no fomigasaun sufisiente hodi halo intervensaun bainhira kazu dengue ne’e mosu.
“Ami-nia fomigasaun no abate sufisiente hodi halo intervensaun ba kazu dengue sira ne’ebé mak iha Ainaro,” nia hatutan.
Aleinde ne’e Servisu Saude Ainaro rejista mós moras sira ne’ebe mak aas iha fulan maiu hanesan Infesaun Vias Respiratoriu Aguda (ISPA), Pneumonia, moras kulit, no diarea.
Notísia relevente:Frederico Bosco alerta atu kombate moras dengue presiza limpeza
Jornalista : Felicidade Ximenes
Editór : Rafael Ximenes de A. Belo
