iklan

HEADLINE, KAPITÁL

MOP introdús website sistema informasaun projetu

MOP introdús website sistema informasaun projetu

Ministru Obra Públika, Abel Pires da Silva, hamutuk ho ekipa halo lansamentu website sistema informasaun projetu sira iha Timor-Leste, iha salaun Gabinete MOP, Caicoli, segunda (26/06/2023). Imajen Tatoli/Francisco Sony

DILI, 26 juñu 2023 (TATOLI)—Ministériu Obra Públika (MOP), segunda ne’e, halo lansamentu website ministériu, Sistema Informasaun Jestaun Projetu (SIGP) no Sistema Informasaun Jeográfika Projetu (SIG-P).

Ministru Obra Públika, Abel Pires da Silva. Imajen Tatoli/Francisco Sony

Website MOP ho enderesu https://mop.gov.tl , Sistema Informasaun Jestaun Projetu https://sigp.mop.gov.tl/ no Sistema Informasaun Jeográfika Projetu https://gis.mop.gov.tl/ .

Ministru Obra Públika, Abel Pires da Silva, hateten, website sistema informasaun rua ne’e importante tanba MOP nu’udar ministériu ne’ebé jere projetu ho orsamentu boot, maibé durante ne’e halo servisu manuál de’it, nune’e hasoru difikuldade barak hanesan dokumentu lakon no seluk tan.

“Entaun ohin konsege lansa sistema online atu hafasil servisu minitériu nian. Ita lansa sistema ne’e ho objetivu muda servisu manuál ba sistema online, nune’e dokumentu sira aseguradu ho di’ak no ita bele hatene progresu servisu hotu, liu-liu projetu sira ne’e, hira mak finaliza ona no ida seidauk,” Ministru dehan iha salaun MOP, Caicoli, segunda ne’e.

Website ne’e iha ligasaun ho Ajénsia Dezenvolvimentu Nasionál, Institutu Públiku (ADN, I.P), nune’e dokumentu projetu sira iha hotu ona sistema ne’e.

“Benefísiu sistema ne’e mak prevene dokumentu lakon no sistema ne’e integradu ona ho sistema ADN, I.P ne’ebé uza Aplication Programing Intreface (API) ho sistema ida-ne’e mak buat hotu rejistadu. Ita bele hatene tuir lala’ok servisu tanba ita-nia papél mak hakarak atu serví rai ne’e ho di’ak, tanba ne’e presiza sistema ida hodi garante,” nia akresenta.

Notísia relevante : La finaliza projetu tuir kontratu, MOP hapara kompañia tolu

Ministru Obra Públika, Abel Pires da Silva, hamutuk ho ekipa halo lansamentu website sistema informasaun projetu sira iha Timor-Leste, iha salaun Gabinete MOP, Caicoli, segunda (26/06/2023). Imajen Tatoli/Francisco Sony

Tuir Ministru, inisiativa kria sistema ne’e tanba hetan inspirasaun hosi sistema ADN, I.P nian ne’ebé lansa antes ona. Iha reuniaun Konsellu Administrasaun Fundu Infraestrutura (KAFI) nian, institutu sempre iha dadus konkretu.

“Liuhosi sistema ne’e, projetu hotu hosi ínisiu to’o agora ita tenke rejista, nune’e servisu hotu hosi munisípiu to’o nasionál bele iha dadus kompletu no ema hotu bele servisu profisional ho apoiu sistem online,” nia tenik.

Sistema online ne’e kria hosi empreza timor-oan, ho kustu hosi $60.000 to’o $80.000.

“Ba oin, ita hein katak la’ós deit ligasaun entre MOP ho ADN, maibé tenke mós ho Komisaun Nasionál Aprovizionamentu (CNA, sigla portugés), nune’e progresu konkursu públiku balun ita bele haree. Sistema online ne’ebé ohin ita lansa ona fasilita tebes MOP nia servisu, tanba ne’e husu ba Governu foun mai bele kontinua jere sistema ne’e ho di’ak hodi serví rai ida-ne’e,” Ministru adianta.

Iha fatin hanesan, Diretór Ezekutivu ADN, I.P, Mariano Renato Monteiro da Cruz, konsidera sistema ne’e importante tebes tanba MOP eziste ona durante tinan 20 maibé servisu ho manuál.

Diretór Ezekutivu ADN, I.P, Mariano Renato Monteiro da Cruz. Imajen Tatoli/Francisco Sony

“Ida-ne’e pasu pozitivu ba ita iha área servisu infraestutura nian, tanba relasiona ho dadus ne’e importante tebes tanba ita hakarak sistema ne’e transparánsia, servisu ho manuál ne’e difikulta tebes tanba dalaruma dokumentu bele lakon maibé agora ho sistema online ne’e fasilita servisu no pasa informasaun ba malu liuhosi online, liu-liu kona-ba projetu,” nia salienta.

Antes ne’e, ADN, I.P halo avaliasaun ba projetu sira durante ne’e, nune’e identifika katak tenke hadi’a sistema servisu, liu-liu kona-ba lavantamentu dadus tanba dala-barak dadus iha sistema hatudu katak preparasaun dokumentu mak ladún di’ak.

“Entaun projetu barak mak aprova tiha iha Parlamentu Nasionál no Prezidente Repúblika promulga ona maibé la konsege ezekuta tanba dokumentu la preparadu. Ba situasaun ne’e ADN, I.P haree di’ak liu projetu sira ne’ebé realiza, dokumentu tenke preparadu, do que fó lista barak no orsamentu aprova ona maibé dokumentu nunka mosu. Ha’u iha dadus projetu hosi tinan 2020 to’o 2023, iha projetu lubuk ida mak naran aprova ona maibé to’o agora ha’u seidauk simu, ida-ne’e ita la aprova tanba seidauk haruka mai ita hodi verifika tanba liuhosi verifikasaun mak ba prosesu aprovizionamentu konkursu públiku mak iha manán-na’in mak foin implementa,” Diretór Ezekutivu deskreve.

Tuir Mariano Renato, liuhosi sistema ne’e bele ajuda institutu ba oin, nune’e ida-ne’ebé preparadu mak tau iha sistema, enkuantu ida seidauk ne’e bele hasai lai nune’e orsamentu ne’ebé aloka atu ezekuta ne’e tenke ezekuta hodi labele paradu iha finansa.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!