La finaliza projetu tuir kontratu, MOP hapara kompañia tolu
DILI, 08 marsu 2023 (TATOLI)—Ministériu Obra Públika (MOP), daudaun ne’e, hapara kompañia tolu nia kontratu tanba la finaliza projetu tuir tempu ne’ebé determina.
“Ita hapara ona kontratu ba kompañia tolu ne’ebé kaer projetu estrada nasionál nian iha parte leste. Tanba sira projetu refere la finaliza tuir kontratu ne’ebé iha,” Ministru Obra Públika, Abel Pires da Silva, hateten ba jornalista, iha Palásiu Governu Dili, kuarta ne’e.
Nia dehan, kompañia tolu ne’ebe MOP hapara kontratu ne’e, kaer projetu estrada nasionál iha parte leste hotu hanesan konstrusaun estraga ligasaun Baucau ba Viqueque.
“Ita hapara sira-nia kontratu tanba ita fó tempu tinan barak ona maibé laiha mudansa. Ikus ita foti desizaun hapara sira-nia kontratu, tanba agora projetu internasionál la’o hela,” nia dehan.
Kompañia sira ne’ebé MOP hapara kontratu, sei haree mós durante sira-nia servisu to’o pursentu hira sei halo verifikasaun no Governu sei selu.
Membru Governu ne’e dehan, agora MOP hapara uluk ona kompañia tolu, maibé sira sei kontinua nafatin halo avaliasaun tan ba kompañia sira ne’ebé progresu servisu tinan barak ona maibé la finaliza hela de’it sei halo notifikasaun ba sira.
“Kompañia sira ne’ebé ita halo verifikasaun no tolu ne’ebé agora ita hapara kontratu ne’e, kompañia sira ne’e aker projetu hahú hosi tinan 2015 to’o 2017,” Abel hateten.
Jornalista : Arminda Fonseca
Editora : Armandina Moniz
