Eis Deputada Carmelita Moniz entrega hikas karreta Prado ba PN
DILI, 27 juñu 2023 (TATOLI)—Eis Deputada CNRT iha lejislatura dalimak, Carmelita Caetano Moniz, tersa ne’e, entrega hikas karreta Prado ho xapa mátrikula A.16.020 ba Parlamentu Nasionál.
Notísia Relevante: PPN husu Deputadu la re-eleitu ba lejislatura daneen entrega karreta Prado
“Ohin, ha’u nu’udar Deputada tinan 16 iha Parlamentu Nasionál hahú kedas iha 2007 até ohin, karreta Prado ha’u lori dezde iha tinan 2012 até 2023 hamutuk tinan 11 ona, tanba ha’u la Deputada ona no sente katak laiha ona direitu lori karreta ne’e,” Carmelita Caetano Moniz hateten ba jornalista sira iha PN hafoin entrega xave no karreta Prado ba PN.
Eis Deputada iha lejislatura dalimak ne’e entrega xave no dokumentu karreta nian direta ba iha Sekretáriu Jerál PN, nune’e bele entrega fali ba deputadu foun sira iha lejislatura daneen atu hala’o serbisu.
Mezmu karreta Prado ne’e atu halo atu lelaun, nune’e troka ona naran sai karreta privadu maibé la konsege halo lelaun, entaun nian nu’udar sidadaun no eis Deputada ida konxiente katak labele lori karreta ba uma uza, maibé entregra hikas xave, dokumenu no karreta ne’e ba PN liuhosi Sekretáriu Jerál PN.
“Depois ida-ne’e kabe ba kompeténsia ba Sekretáriu Jerál Administrasaun Parlamentu Nasionál ho meza no Prezidente PN, atu deside oinsá iha futuru karreta ida-ne’e, depende ba PN mak atu toma desizaun. Maibé, ohin, formalmente ha’u hakarak entrega hikas patrimóniu PN ho kondisaun kapaas tebe-tebes, hodi Deputadu foun sira bele uza atu hala’o sira-nia serbisu,” nia hateten.
Nia hato’o agradesimentu ba PN ne’ebé durante ne’e atribui karreta refere ba nia hodi fasilita hala’o serbisu tinan barak iha Parlamentu Nasionál (PN), nu’udar Deputada ne’ebé nia mandatru ramata iha lejislatura dalimak.
Sekretáriu Jerál PN, Adelino Afonso de Jesus, hatetem nia-parte simu ona xave no dokumentu karreta Prado ne’ebé durante ne’e eis Deputada Carmelita Moniz uza iha tinan barak nia laran.
“Lori sekretáriadu PN nia naran haoto’o agradesimentu, tanba simu fali karreta Prado ne’e. Depois, kona-ba ninia utilizasaun meza foun no Prezidénsia foun sei rezolve ninia atribuisaun iha future,” nia hateten.
Sekretáriu Jerál PN ne’e, lakohi fó komentáriu kona-ba karreta hira mak eis Deputadu/a iha lejislatura dalimak ne’ebé la re-eleitu entrega ona, inklui atribuisaun karreta ba iha deputadu eleitu foun iha lejislatura daneen.
Notísia Relevante: PN kansela halo lelaun ba karreta Prado
Jornalista : Nelson de Sousa
Editór : Cancio Ximenes
