Top

Kalohan la envolve iha Governu tanba konsentra serbisu iha PN

Prezidente Partidu CNRT, Xanana Gusmao hamutuk ho Sekretáriu Jerál Partidu Demokrátiku (PD), António da Conçeição "Kalohan". iha Palásiu Prezidensiál Nicolau Lobato, Bairru Pité, tersa (07/06). Imajen Tatoli/Egas Cristovão.

DILI, 03 jullu 2023 (TATOLI)—Xefe bankada Partidu Demokrátiku (PD) no atuál Sekretáriu Jerál Partidu Demokrátiku (PD), António da Conceição ‘Kalohan’, hateten nia la envolve iha estrutura IX Governu tanba konsentra lai serbisu iha Parlamentu Nasionál.

Notísia Relevante: PM Xanana: “Loron 120 sei anula lei kria munisípiu Ataúro-konsolida pás”

Nia hatutan, Deputadu lejislatura daneen foin simu pose iha 22 juñu liu ba to’o ohin sai nafatin Deputadu hela, maibé ami mós iha responsabilidade ida ba koligasaun ne’ebé daudaun iha.

Hanesan sekretáriu jerál PD, iha responsabilidade ida ba koligasaun ida_ne’e iha Parlamentu Nasionál, tanba Prezidente no sekretáriu jerál CNRT no prezidente PD mós laiha PN, entaun nia parte hola kna’ar atu asegura entre partidu rua, CNRT ho PD.

“Hakarak atu dehan ba públiku tomak katak la’ós iha problema interna iha Partidu Demokrátiku mak halo ha’u la tama iha Governu, tanba pasta ida-ne’ebé mak ha’u simu, ha’u rasik laiha kbiit ba ida-ne’e, pasta primeiru ne’ebé mak fó Ministru Negósiu Estranjeiru no Kooperasaun. Maske ha’u hasai ha’u-nia mestradu iha relasaun internasionál, maibé hakarak dehan durante ne’e barak liu ajusta an polítika iha rai-laran ninian. Tanba ne’e, ha’u rekuza atu ba sai MNEK hodi fila-fali mai fatin ne’e ba koligasaun nia membru ida,” Kalohan hateten ba jornalista sira iha uma fukun Parlamentu Nasionál, segunda ne’e.

Nune’e, nia klarifika situasaun ne’ebé daudaun públiku karik hanoin no dúvida hela laiha pozisaun ida ba nia parte iha ezekutivu ka Governu nu’udar sekretáriu jerál PD.

“Ha’u klarifika, ha’u mak rekuza hosi pasta ida-ne’e hodi nune’e bele konsentra lai serbisu iha Parlamentu nian to’o ami estabelesidu. Katak, koligasaun tenke metin tiha lai, pasa tiha nia programa, orsamentu retifikativu no orsamentu jerál Estadu 2024,” nia hateten.

Nia hateten, nia parte konsentra lai serbisu sira-ne’e to’o hotu no bainhira fila-fali hanesan sidadaun baibain serbisu saida de’it prontu hala’o nafatin, no nia-parte hanesan funsionáriu MNEK ho nível VI no daudaun ne’e lisensa seim vensimentu hodi bele hala’o funsaun polítika ninian, entaun seida’uk tama idade reforma ne’e loron ida sei fila ba MNEK.

“Ha’u-nia mandatu la to’o tinan lima, hanoin sei dura to’o tinan 2024 bainhira orsamentu aprovadu ona/ Ha’u sei buka husik ha’u-nia fatin (hanesan Deputadu), nune’e bele fó fali espasu ba ami-nia kolega sira seluk ne’ebé iha mós lista feto pontensiál ne’e, nia tama tan iha PN sei di’akliu,” nia hateten.

Notísia Relevante: CNRT-PD formaliza koligasaun forma Governu, Xanana Gusmão sai PM

Jornalista : Nelson de Sousa 

Editór       : Cancio Ximenes 

Publisidade

Leave a Reply

Latest Post

error: Content is protected !!