PN aprova projetu deliberasaun konstituisaun komisaun espesializada permanente
DILI, 03 jullu 2023 (TATOLI)—Parlamentu Nasionál (PN), segunda ne’e, liuhosi reuniaun plenária aprova projetu deliberasaun númeru 3/VI- konstituisaun komisaun espesializada permanente ho votu a-favór 61, kontra 0 no abstensaun 0.
Notísia Relevante: Bankada parlamentár koloka ona Deputadu sira ba komisaun espesializada permanente
“Nune’e, projetu deliberasaun ne’e aprova ho unanimidade,” Prezidente Parlamentu Nasionál, Maria Fernanda Lay, hateten iha sala plenária Parlamentu Nasionál.
Sekretária Meza PN, Virgínia Ana Belo, hateten inísiu kada lejislatura plenária Parlamentu Nasionál proposta hosi meza rona konferénsia delibera konstituisaun komisaun espesializada permanente.
“Deliberasaun ne’e determina designasaun kada komisaun númeru komisaun konstitui respetiva kompeténsia hanesan mós númeru Deputadu kada komisaun espesializada permanente no distribuisaun diferensa bankada parlamentár,” nia hateten.
Nune’e. nia dehan, PN delibera tuir termu númeru 1 artigu 27 no númeru 1 artigu 30 iha Rejimentu Parlamentu Nasionál (RPN) hanesan tuir mai;
Konstitui komisaun espesializada permanente hamutuk hitu (7) ho ninia denominasaun no kompozisaun;
- Komisaun A trata asuntu Konstituisionál no Justisa ho membru Deputadu na’in-hitu (7);
- Komisaun B trata asuntu Negósiu Estranjeiru no Defeza ho Seguransa ho membru Deputadu na’in-11;
- Komisaun C trata asuntu Finansa Públika ho deputadu na’im-10;
- Komisaun D trata asuntu Ekonomia no Dezenvolvimentu ho Deputadu na’in-11;
- Komisaun E trata asuntu Infraestrutura ho membru Deputadu na’in-sia (9);
- Komisaun F trata asuntu Saúde, Seguransa Sosiál no Igualidade Jéneru ho membru deputadu na’in-ualu (8);
- Komisaun G trata asuntu Edukasaun, Juventude, Kultura no Sidadania ho membru Deputadu na’in-hitu (7).
Nia hateten, área kompeténsia espesífika kada komisaun iha ámbitu ezerse kompeténsia konsagra iha rejimentalamente konsta iha anexu dahuluk iha prezente deliberasaun hola parte integrante.
Númeru Deputadu kada komisaun ho nia distribuisaun hosi bankada parlamentár konsta iha anexu daruak prezente deliberasaun hola parte integrante.
Entretantu, PN mós aproia projetu deliberasaun konstituisaun Komisaun permanente.
Tuir Rejimentu Parlamentu Nasionál (PN) artigu 35 (Komisaun espesializada permanente sira-nia kompeténsia) mak;
a.) Diskute no fó paresér kona-ba projetu no proposta-lei, proposta ba alterasaun no
tratadu hirak-ne’ebé submete ba Parlamentu;
b.) Apresia petisaun sira-ne’ebé ema haruka ba Parlamentu;
c.) Hatene tuir problema polítiku no administrativu ne’ebé relasiona ho sira-nia kna’ar no
fornese informasaun ba Parlamentu, bainhira Parlamentu hanoin katak konveniente,
ne’ebé presiza ba apresiasaun aktu Governu nian;
d.) Hala’o audiénsia públika ho entidade sira hosi sosiedade sívil;
e.) Konvoka kualkér titulár órgaun administrasaun públika nian hodi fó informasaun kona-ba asuntu ne’ebé relasiona ho sira-nia kna’ar.
Iha lejislatura daneen ne’e partidu koligasaun CNRT ho kadeira 31, Partidu Demokrátiku (PD) kadeira neen (6) nune’e ho forsa polítika maiória absoluta iha PN ho kadeira hamutuk 37, enkuantu bankada opozisaun FRETILIN ho kadeira 19, KHUNTO kadeira lima (5) no Partidu Lipertasaun Populár (PLP) ho kadeira haat (4).
Notísia Relevante: Maria Fernanda Lay sai feto inspiradora ba feto Timor-Leste
Jornalista : Nelson de Sousa
Editór : Cancio Ximenes
