DILI, 05 jullu (TATOLI)— Moras Infesaun Vias Respiratória (ISPA) rejistadu hamutuk 186 iha Sentru Saúde Laleia, Postu administrativu Laleia, Munisípiu Manatuto.
“Moras ISPA ne’e la’ós moras foun maibé moras ne’e hanesan domina ona ita nia rain entaun atu prevene ida ne’e mak presiza ijene moos tanba iha fulan juñu ita rejista pasiente sira hamutuk 186,” Xefe Sentru Saúde Laleia, José da Costa informa ba Tatoli via telefone, ohin.
Nia informa, pasiente sira ne’ebé mai rejista iha sentru refere ho idade 15 mai karaik tanba klima hodi hamosu moras ne’e barak liutan.
“Pasiente sira ne’ebé ita rejista ne’e mai husi labarik kiik tinan lima mai kraik no mós ema boot sira, tanba haree ba tempu udan rai-rahun su’ar, la taka ibun ho maskara no ijene ne’ebé la moos afeta ba moras ida ne’e,” nia dehan.
Notísia relevante:2022: ISPA domina iha territóriu nasionál
Tuir pesoál saúde katak daudaun ne’e tempu bailoron maibé udan kontinua monu rai ida ne’e kauza para ema atu moras hotu bainhira la halo prevensaun ba nia an.
“Agora ita haree daudaun tempu bailoron ona mais udan tau nafatin ida ne’e afeta ba ita saúde nomós iha uma ka bairo ne’ebé ijene la moos bele hetan moras sira ne’e,” nia dehan.
Tanba ne’e, ezekutivu ne’e haktuir, profisionál saúde sira durante ne’e fó nafatin hanoin ba inan-aman sira atu kuidadu labarik sira atu nune’e evita moras ne’e.
“Kazu Infesaun Vias Respiratoriu ne’e ami-nia pesoál saúde sira halo counseling (konsellu) ba família pasiente ne’ebé mai konsulta atu nune’e kuidadu oan sira,” nia subliña.
Notísia relevante:Klínika Bairru-Pité rejista pasiente ISPA na’in-467 no má nutrisaun 18
Entertantu, Sentru Saúde Laleia mós rejista moras tee-been águda hamutuk 18, husi ne’e afeta ba labarik idade 15 mai kraik; mane na’in ualu no feto na’in 10.
Jornalista : Felicidade Ximenes
Editór : Rafael Ximenes de A. Belo
