SMOP identifika ponte tolu iha Covalima ameasadu kotu
COVALIMA, 05 jullu 2023 (TATOLI)–Servisu Munisipál Obra Públika (SMOP) Covalima indentifika kondisaun ponte Lomea ne’ebé lokaliza iha suku Tashilin, postu Zumalai, ponte Rai Ketan iha suku Labarai, postu Suai no ponte Karau Ulun iha suku Ogues, postu Maucatar munisípiu Covalima difikulta movimentu transporte públiku tanba ponte kotu.
Notísia Relevante: Xanana orienta MOP halo intervensaun infraestrutura hetan impaktu dezastre naturál
“Ha’u atu informa katak impaktu hosi udan boot iha munisípiu Covalima ne’e, rezulta ponte Rai Ketan, ponte Lomea no ponte Mali Girik amesadu atu kotu tanba foin lalais halo ateru ameadu atu kotu tan tanba oras ne’e daudaun udan iha munisípiu covalima seidauk para,” Diretór SMOP Covalima, Alberto Cardoso, hateten ba Agência Tatoli liuhosi telefónika, kuarta ne’e.
Diretór ne’e hateten, ponte tolu ameasadu kotu tanba iha munisípiu Covalima to’o ohin loron udan seidauk para, nune’e bainhira udan akontese volume bee-mota sulin ho makaas ne’ebé difikulta movimentu ema no transporte públiku atu hakat liu.
Kondisaun ponte tolu refere, tuir nia, Servisu Munisipál Obra Públika Covalima relata ona ba administradór munisípiu Covalima no administradór mós relata ona ba iha nasionál maibé to’o agora seidauk iha rezultadu.
“Kondisaun ponte tolu ne’e, ita informa ona ba administradór munisípiu no ba iha nasionál nune’e ita munisípiu hein de’it, tanba ita iha munisípiu laiha ekipamentu pezadu,” nia dehan.
Maske Servisu Obra Públika laiha ekipamentu pezadu atu halo normalizasaun maibé foin lalais kompañia Weste J. Unipesoál, Lda, manán ona konkursu públiku atu halo manutenasaun.
“Agora, ami hein kompañia Weste J atu halo atendimentu, nune’e bele halo normalizasaun tanba foin lalais kompañia asina kontratu atu halo manutensaun ba estrada.
Aleinde ponte tolu ameasadu kotu maibé estrada iha suku Zulo, postu Zumalai transporte públiku labele halo movimentu tanba estrada kotu no mós iha postu sira seluk ne’ebé Servisu Obra Públika seidauk identifika.
Xefe suku Labarai, Mouzinho Amarál, fó atensaun ba komunidade suku Labarai, atu ida-idak kuidadu nia oan labele la’o ba-mai iha mota ninin, tanba agora udan halo bee-mota sulin ho volume boot.
Lideransa komunitária ne’e mós fó orientasaun ba xefe aldeia sira atu kontrola ida-idak nia aldeia, nune’e bele hatene tuir tipu dezastre ne’ebé akontese iha aldeia hodi bele relata relatóriu bazeia situasaun reál.
Notísia Relevante: Bee-mota Rai Ketan lori-sasurut uma tolu iha suku Labarai
Jornalista : Celestina Teles
Editór : Cancio Ximenes
