DILI, 06 jullu 2023 (TATOLI)—Antigu Primeiru-Ministru (PM), Taur Matan Ruak, sente triste haree notísia iha semana ne’e nia-laran kona-ba akontesimentu dezastre naturál iha Kosta Súl.
“Ha’u-nia sentida kondolénsia ba família sira ne’ebé lakon sira-nia ema iha dezastre ida-ne’e, no ha’u-nia solidariedade boot ba família vítima sira ne’ebé afetadu iha dizastre naturál,” Taur hateten liuhosi nota ne’ebé Agência Tatoli asesu, kinta ne’e.
Nia akompaña no nota katak, dezastre naturál ne’e estraga infraestrutura públika no privada lubuk ida inklui hamate sidadaun balun.
“Akontesimentu ne’e fó hanoin fali ita ba kalamidade ne’ebé akontese iha loron 04 abríl 2021, ne’ebé kuaze destrói infraestrutura lubuk ida no hamate ita-nia sidadaun balun,” nia akresenta.
Notísia relevante : Governu apoia ona nesesidade bázika ba vítima dezastre naturál
Nune’e, Antigu Xefe Governu ne’e fiar katak IX Governu Konstitusionál liuhosi Primeiru-Ministru, Kayrala Xanana Gusmão orienta ona liña ministeriál sira atu halo asaun emerjénsia imediata ruma hodi salva populasaun, sira-nia bens inklui buka minimiza risku boot sira.
“Ha’u mós solidariza IX Governu no realsa iha situasaun sira hanesan ne’e ita tenke hamutuk luta hodi rekupera, reabilita no rekonstroi fali distruisaun hirak ne’ebé provoka hosi dezastre naturál,” Taur tenik.
Antes ne’e, Autoridade Protesaun Sivíl fó ona apoia emerjénsia ba vítima dezastre naturál ne’ebé akontese iha loron 01 to’o 04 jullu 2023, iha munisípiu Lautém, Manufahi, Covalima, Ainaro no Viqueque.
Jornalista : Antónia Gusmão
Editoa : Julia Chatarina
