IX Governu kontinua diskute programa iha loron sábadu no domingu
DILI, 07 jullu 2023 (TATOLI)–IX Governu Konstitusionál ne’ebé lidera hosi Primeiru-Ministru, Kay rala Xanana Gusmão hamutuk ho membru Governu na’in-46 diskute programa durante loron-lima ona, hahú tersa (04/07) to’o ohin loron no sei kontinua iha loron sábadu no domingu.
Xanana Gusmão hateten hafoin simu pose, membru Governu sira hahú diskusaun programa molok lori ba Parlamentu Nasionál hodi hetan aprovasaun.
“Daudaun ami diskute hela programa, loos duni to’o ona loron lima, ne’ebé seidauk lori ba Parlamentu tanba sei halo diskusaun hela, mak ansi lori ba parlamentu karik simu tiha pose ami haruka kedas ona ba, maibé ami tenke debate to’o kalan, ne’e katak buat barak tenke debate,” nia dehan iha Palásiu Governu, sesta ne’e.
Notísia relevante : Governu afirma kompromisu serbisu loron 120 nian iha reuniaun dahuluk KM
Xefe Governu konsidera programa ne’e importante, tanba ne’e membru Governu nafatin halo diskusaun iha fim-de-semana.
Maski nune’e, PM seidauk bele dehan diskusaun to’o loron hirak nia laran tanba daudaun diskusaun la’o hela.
“Horikalan (kinta) ami sai tuku 20:00, aban sábadu no domingu mós ami sei serbisu nafatin, ami la simu tan osan tanba seidauk lejítimu,” nia akresenta.
Primeiru-Ministru, Xanana Gusmão ho membru Governu sira simu pose iha loron 01 jullu 2023, iha Palásiu Prezidensiál, Bairu-Pité.
Jornalista : Antónia Gusmão
Editora : Julia Chatarina
