OÉ-CUSSE, 10 jullu 2023 (TATOLI) – Departamentu Rejionál Transporte Terrestre (DRTT), Rejiaun Administrativa Espesiál Oé-Cusse Ambeno (RAEOA), propoin atu aumenta rekursu umanu no fasilidade hanesan mákina no tinta emprezora inklui komputadór hodi mellora di’ak liután atendimentu públiku kona-bá tratamentu dokumentu transporte nian.
Notísia relevante: Trimestre daruak 2023, DRTT Oé-Cusse kontribui rihun $23-resin ba kofre Estadu
Xefe Departamentu Rejionál Transporte Terrestre Oé-cusse, Silvestre Sila Teme, hateten, nu’udar servidór Estadu iha instituisaun públiku, sempre iha fallansu, tanba problema fasilidade no menus rekursu umanu.
“Tanba ami-nia funsionáriu menus iha na’in-19 de’it, ami tenke koloka balu ba fronteira sira, balu ba iha merkadu, entaun ami-nia pesoál atu hein atendimentu iha edifísiu dalaruma menus, no servisu balu dalaruma paradu,” Silvestre Sila Teme, relata ba jornalista sira iha Oé-Cusse, segunda ne’e.
Nia informa, foin daudaun ne’e departamentu DRTT hetan kolokasaun simu estudante sira hosi ensinu sekundáriu, hala’o estajiu, ho prezensa estudante sira-ne’e mak bele apoiu iha servisu balu, maibé hafoin remata estagíu, kada funsionáriu ida tenke kobre servisu rua to’o tolu.
“Ami-nia problema la’ós funsionáriu de’it, maibé iha difikuldade ba tinta imprezora komputadór sei menus, bainhira iha avaria susar tebes, tanba ami-nia pesoál IT laiha, sé mak hadi’a no halo manutensaun ba komputadór sira no mákina printing nian,” nia afirma.
“Maibé solusaun ne’ebé ami iha, ha’u tenke buka meiu atubele ajuda, ida-ne’e orsamentu hosi edifísiu ba manutensaun mós laiha, ha’u maka buka meiu, tanba ami-nia IT iha tempu ne’ebá, nia tuur ahi lisensa, entaun servisu balu paradu, entaun ita tenke bolu ema hosi li’ur bele mai hadi’a sasán sira falla ne’e,” nia informa.
Nia fó-sai katak, funsionáriu iha DRTT na’in-19 la garante atu kobre hotu servisu sira iha departamentu ne’e rasik, tanba iha item-item servisu sira barak, hanesan, rejistu ba dokumentu transporte sira, servisu atendimentu dokumentu troka naran transporte, duplikat ka STNK sira, ba xapa matríkula, inklui inspesaun no lisensa tránzitu, karta kondusaun no DSPL.
“Entaun ami-nia funsionáriu ne’e menus duni, tanba balu koloka ba fronteira balu ba merkadu hela na’in hira maka loron-loron halo atendimentu iha edifísiu,” nia katak.
Nia dehan, tuir loloos planu iha tinan kotuk presiza halo rekrutamentu foun, maibé hosi Autoridade RAEOA deside adianta ba 2024, tanba iha 2023 ne’e enfrenta festa demokrasia, nune’e adianta ba tinan oin mak foin bele loke konkursu públiku atu halo rekrutamentu.
“Problema hirak-ne’e ami enfrenta kuaze tinan ida ona, maibé atu garante atendimentu la’o di’ak, kada funsionáriu ida tenke asumi responsabilidade rua tolu, nune’e fó atendimentu ba públiku,” nia garante.
Notísia relevante: Trimestre dahuluk 2023, DRTT Oé-Cusse rekolla reseita rihun $28-resin
Jornalista: Abílio Elo Nini
Editór: Evaristo Soares Martins
