Estadu haloot Saudozu Lú Olo ho dignu, povu rihun ba rihun reza ho matan-been
DILI, 26 Juñu 2026 (TATOLI)—Estadu Timor-Leste haloot ona hallot ona antigun Prezidente Parlamentu Nasionál no Prezidente Repúblika, Francisco Guterres Lú Olo, iha jardin ba eroi sira-nian iha Metinaru, Sesta (26 Juñu 2026).
Timoroan atus ba rihun, maioria povu ki’ik no ki’ak sira halo sakrifisiu hakat to’o Jardin ba Eroi sira iha Metinaru hodi asiste no fó omenajen ikus ba Saudozu Francisco Guterres “Lú-Olo” iha nia fatin hakmatek ikus nian.
Ema hotu reza ho matan-been hodi hatudu sira-nia laran susar ho matan-been tanba sira sente lakon líder nasionál ne’ebé simples, umilde, onsetu no hakuak ema hotu iha situasaun ksolok no terus, no sente lakon “Prezidente Ba Povu” ne’ebé hadomi povu ho fuan no laran.
Hahú husi Saudozu Lú-Olo husik iis iha Ospital Prince Court, Kuala Lumpur, Malázia, iha loron 21 Juñu 2026, timoroan sira sente lakon Maubere Puru ne’ebé luta ba autodeterminasaun durante tinan 24 iha ai-laran no luta hodi kontribui ba dezenvolvimentu nasionál durante tinan 24 nia laran mós.
Timoroan sira sente lakon duni ona sira nia saudozu Lú Olo iha sira nia leet. Bainhira saudozu Lú Olo nia kadáver lori la’o ba vizita ikus fatin sira hanesan CCF, Kuartel jeneral F-FDTL, Palasiu Prezidensiál. Hala’o misa requiem mo vizita Parlamentu Nasional hafoin lori ba Jardin ab eroi sira iha Metianru.
Tuir dalan, husi Bidau, Kuluhun, Bekora, Hera to’o Metinaru, timoroan sira hamriik tutir dalan kaer aifuan hodi kari ba karreta funeráriu, hako’ak saudozu Lú Olo nia retratu, bandeira meia aste dada tutuir dalan, hodi hodi hein no fó omenajen ikus ba saudozu Lú Olo.
Komunidade ida husi Munisipiu Manatutu, Januario da Silva, hateten hanesan povu Manatutu sente triste no lakon eroi ida-ne’ebé hadomi nia povu, nune’e ohin dadeer husu ona nia misa depois de misa ramata hamutuk ho autoridade no veteranu sira mai tau ai-funan iha Metinaru.
”Ami hamutuk ho autoridade inklui veteranu mai tau ai-funan iha Metinaru. Maibé, hanesan sidadaun Manatutu, ami hakarak mai partisipa serimónia fúnebre tanba saudozu Lú olo hanesan aman ba nasaun. Hakarak ka lakohi tenke marka presenza no fó omenajen ikus,” nia dehan.
Sidadun ida husi Munisipiu Baukau, Carlos Freitas, sente lakon aman ida-ne’ebé durante akompaña iha tinan 24 nia l;aran iha Timor-Leste.
“Saudozu Lú Olo hanesan figura ida-ne’ebé ema sei la hetan fila-fali, tanba figura ida-nee hanesan aman ida fó nia an ba rai ida-ne’e. Saudozu nunka no lahatene insulta no lahatene hirus ema. Aman ida-ne’e sai ezemplu di’ak ba joven sira no ba Timor hotu atu la’o tuir nia modelu ida ne’e,” nia dehan.
Jornalista : Felicidade Ximenes
Editór : Cancio Ximenes
