Komunidade Labarai husu Governu normaliza mota Rai Ketan
COVALIMA, 11 jullu 2023 (TATOLI)–Komunidade suku Labarai, postu administrativu Suai, munisípiu Covalima husu Governu atu halo normalizasaun lalais mota Rai Ketan baliza entre suku Belekasak, postu Maucatra ho suku Labarai, postu Suia, nune’e bainhira udan labele kontinua afeta ba komunidade.
Notísia Relevante: Bee-mota Rai Ketan lori-sasurut uma tolu iha suku Labarai
“Ami husu Governu atu halo normalizasaun lalais mota Rai Ketan, nune’e bee-mota bele suli tuir nia dalan, bainhira udan labele afeta ba komunidade iha suku Labarai, postu Suai,” Aleixo Perreira Carvalho hateten ba Agência Tatoli, iha suku Labarai, tersa ne’e.
Udan ne’ebé akontese iha loron 3-4 fulan-jullu tinan 2023 ne’e, halo bee-mota Rai Ketan suli makaas hodi sasurut komunidade nia uma tolu iha suku Labarai, no bainhira la halo normalizasaun sei kontinua afeta ba komunidade seluk tanba agora uma rua ameasadu mota atu lori tan.
Abinante ne’e husu, bainhira udan boot atu labele lori tristeza ba komunidade entaun Governu tenke halo normalizasaun ba mota Rai Ketan, nune’e bee bele seuli-halai tuir nia dalan, se lae bainhira udan tan ne’e nafatin lori dezastre ba komunidade.
António da Conceicão hateten, iha tempu udan atu labele komunidade kontinua sai vítima Governu tenke halo normalizasaun mota Rai Ketan, se lae komunidade kontinua sai vítima ba dezastre naturál.
“Ami husu Governu atu halo normalizasaun ba mota Rai Ketan, nune’e bainhira tempu udan ne’e bee-mota sulu no halai tuir nia dalan, no labele lori dezastre ba komunidade tanba agora bainhira udan tan ne’e, bee-mota bele suli makaas no sasurut tan komunidade nia uma rua ne’ebé amesadau atu monu tan,” nia dehan.
XefE Suku Labarai, Mozinho Amarál, hateten Governu presiza halo normalizasaun ba mota Rai Ketan ho urjente, se lae udan-boot mai ne’e bee-mota Rai Ketan sei sasurut komunidade nia uma ne’ebé agora ameasadu atu monu tan.
“Ha’u husu Governu presiza halo normalizasaun Mota Rai Ketan ho urjente, nune’e bainhira udan tan karik komunidade labele sai vítima ona ba dezastre natural, tanba foin lalais udan ne’e rezulta bee-mota Rai Ketan sasurut komunidade nia uma tolu,” nia hateten.
Udan boot ne’ebé akontese iha munisípiu Covalima, hodi halo mota Rai Ketan boot lori komunidade nia uma tolu (3) iha aldeia Holba, Bairru Lonsele, suku Labarai, postu administrativu Suai ne’ebé baliza entre suku Belekasak, postu Maucatar, munisípiu Covalima.
Tuir dadus iha trimestre dahuluk, Servisu Munisipál Protesaun Sivil Jestaun no Dezastre Naturál rejista uma-kain ne’ebé afeta ba dezastre naturál hamutuk uma 131 ho tipu Ani boot estraga uma 121, inséndiu hamutuk rua (2), rai halai estraga uma hitu (7), uma aat natoon hamutuk 19, uma aat kmaan hamutuk 64 no uma aat total ne’e hamutuk 46 ne’ebé hetan hotu ona apoiu emerjénsia hodi Govetrnu.
Jornalista : Celestina Teles
Editór : Cancio Ximenes
