Vítima dezastre naturál iha Labarai seidauk hetan apoiu emerjénsia
COVALIMA, 11 jullu 2023 (TATOLI)–Vítima afetadu Dezastre Naturál ne’ebé akontese iha suku Labarai, postu administrativu suai, munisípiu Covalima, to’o agora seidauk hetan apoiu emerjénsia husi Governu liuhosi Autoridade Covalima.
Notísia Relevante: Bee-mota Rai Ketan lori-sasurut uma tolu iha suku Labarai
Vítima Dezastre Naturál hosi suku Labarai, Aleixo Perreira Carvalho, hateten udan boot ne’ebé akontese iha loron 3-4 fulan-jullu tinan 2023 ne’ebé mota Rai Ketan lori-sasurut sira-nia uman ne’e to’o agora sei hein hela apoiu emerjénsia hosi parte kompetente sira.
“Ami vítima dezastre naturál hosi suku Labarai, ne’ebé udan boot akontese iha 3-4 fulan-jullu tinan 2023 ne’ebé afeta bee–mota Rai Ketan lori ha’u nia uma no sasán uma laran la salva ne’e, salva de’it roupa, no ohin loron ami seidauk hetan apoiu emerjénsia hosi autoridade Covalima,” Aleixo Perreira Carvalho hateten ba Agência Tatoli iha suku Labarai, tersa ne’e.
Maske seidauk hetan apoiu emerjénsia maibé nia buka rasik ai-han, nune’e bele auguenta moris ne’ebé provizóriu sei hela iha uma MDG ne’ebé husiuk mamuk iha suku Matai, postu Maucatar, munisípiu Covalima.
Nune’e mós, vítima Lucas Soares hateten to’o ohin loron seidauk hetan apoiu emerjénsia ruma hosi autoridade kompetente, nune’e halo esforsu rasik hodi hetan ai-han bele han hamutuk ho família uma laran.
“Ami seidauk hetan apoiu emerjénsia hosi autoridade sira. Ami buka rasik ai-han hodi han. Iha momentu bee-mota sasurut ha’u-nia uma ne’e, ha’u konsege salva de’it ha’u-nia ferik-oan ho ha’u-nia oan no roupa seluk la salva,” nia dehan.
Xefe suku Labarai, Mozinho Amarál, husu parte relavante atu fó apoiu emerjénsia ba vítima dezastre naturál tanba vítima husi suku Zulo, postu Zumalai hetan ona apoiu maibé vítima sira iha suku Labarai seidauk hetan apoiu.
“Udan boot lori dezastre ba komunidade la’ós suku zulo de’it maibé komunidade suku Labarai mós hetan dezastre, tanba bee-mota Rai Ketan lori-sasurut komunidade na’in-tolu nia uma, maibé sira seidauk hetan apoiu emerjénsia ruma,” nia dehan.
Líder komunitáriu ne’e husu ba Governu liuhosi autoridade Covalima atu tau iha konsiderasaun hodi fó apoiu emerjénsia ba vítima dezastre naturál iha suku Labarai, postu Suai, munisípiu Covalima.
Antes ne’e, Autoridade Covalima liuhosi Servisu Munisipál Protesaun Sivil Jestasaun Risku Dezastre naturál sei halo lavantamentu dadus vítima dezastre naturál, iha munisípiu Covalima tomak.
Durante udan boot ne’e, postu administrativu sira-ne’ebé afetadu ba inundasaun mak hanesan postu administrative Tilomar, Suai, Maucatar no postu administrative Zumalai ne’ebé hetan ona apoiu emerjénsia.
Jornalista : Celestina Teles
Editór : Cancio Ximenes
