DILI, 12 jullu 2023 (TATOLI)—Governu liuhosi reuniaun Konsellu Ministru (KM), kuarta ne’e, aprova ona programa IX Governu Konstitusionál, ne’ebé kompoin área prinsipál neen.
“Konsellu Ministru aprova ona rograma Governu Konstitusional IX. Programa ne’e sintetiza polítika públika prinsipál ne’ebé atu adota durante Governu ninia mandatu,” Ministru Prezidénsia Konsellu Ministru , Agio Pereira, hateten hafoin reuniaun ezekutivu, iha Palásiu Governu.
Área prinsipál neen ne’e mak hanesan Estadu Direitu Demokrátiku, dezenvolvimentu kapitál sosiál, dezenvolvimentu infraestrutura, dezenvolvimentu ekonomia, konsolidasaun governativa no boa governasaun, no kombate korrupsaun.
Notísia relevante : IX Governu kontinua diskute programa iha loron sábadu no domingu
Ministru esplika, área hirak ne’e integra iha programa Governu ho objetivu atu hametin no otimiza setór governasaun no sira-nia rekursu hodi habadak dalan atu transforma vizaun Ajenda Dezenvolvimentu Sustentável 2030 inklui Planu Estratéjiku Dezenvolvimentu 2011-2030 nian hodi sai realidade.
Hafoin programa ne’e hetan tiha aprovasaun iha KM, tuir mai Governu sei lori ba Parlamentu Nasionál hodi diskite no aprova.
Biban hanesan, ezekutivu sira delibera ona hodi aprezenta ba Parlamentu Nasionál ho votu konfiansa ida ba Governu, ne’ebé fundamenta hosi kompromisu firme no determinadu Governu atu implementa ninia programa, ho objetivu atu promove dezenvolvimentu, prosperidade no moris di’ak ba sidadaun timor-oan.
Antes ne’e, hafoin membru IX Governu na’in-47 simu pose iha loron sábadu (01/07), hahú serbisu iha segunda (03/07) no halo diskusaun ba programa Governu durante loron-neen nia laran.
Jornalista : Antónia Gusmão
Editora : Julia Chatarina
