DILI, 13 jullu 2023 (TATOLI)—Vise Primeiru-Ministru no Ministru Turizmu no Ambiente Francisco Kalbuadi Lay, kinta ne’e, hetan vizita hosi Embaixadór España, Francisco Aguilera Aranda, hodi ko’alia kona-ba kooperasaun serbisu iha área turizmu no ambiente iha futuru.
“Ohin Embaixadór España nia vizita ne’e, mai dahuluk hato’o felisitasaun ba IX Governu no ami rua ko’alia oitoan kona-ba serbisu ne’ebé bele halo hanesan kooperasaun entre Timor-Leste no España iha futuru, iha área meiu ambiente no mós turizmu nian, ne’ebé sira prontu atu fó apoiu rekursu umanu, kapasitasaun no seluk tan,” Ministru Francisco Kalbuadi, hateten iha Farol, kinta ne’e.
Notísia relevante : Timor-Leste sei simu prémiu pás no rekonsiliasaun iha España
Nia dehan, programa no planu prioridade iha área turizmu no ambiente iha mandatu IX Governu, daudaun Konsellu Ministru aprova ona no submete ona ba Parlamentu Nasionál.
“Ita atu ko’alia planu no priodade sira ne’e, hein hetan aprovasaun hosi Parlamentu Nasionál mak bele ko’alia,” nia akresenta.
Iha fatin hanesan, Embaixadór España, Francisco Aguelera Aranda, sente kontente bele hasoru malu ho Vise Primeiru-Ministru tanba vizita ne’e atu koñese membru Governu foun sira hodi hametin relasaun entre país rua.
“Intensaun hosi hau-nia vizita ne’e mak atu koñese membru Governu foun, tanba klaru, España hakarak tebes atu dezenvolve liután relasaun ho Timor-Leste, nune’e hau-nia intensaun mai iha ne’e atu partilla ho Vise Primeiru-Ministru kona-ba saida mak ami bele halo,” nia dehan.
Governu foun iha planu no prioridade foun, tanba ne’e vizita ne’e Embaixadór hakarak hatene kona-ba kestaun hirak no iha esperansa bele foti asaun ruma hodi apoia Timor-Leste, jeralmente buat ne’ebé importante ba Embaixada mak disponibilidade hodi apoia Governu Timor-Leste atu nune’e bele implemente projetu no prioridade sira.
“Área ne’ebé ami ko’alia mak hanesan turizmu, ambiente, no polítika Governu nian iha setór ekonomia, klaru katak ami sei disponível hodi apoia Governu Timor-Leste iha área hirak ne’e,” Francisco tenik.
Governu España liuhosi nia Embaixada prontu apoiu Timor-Leste nune’e iha futuru sei komunika ho Embaixada kona-ba projetu no prioridade Governu nune’e bele hamutuk buka solusaun saida de’it atu ajuda.
“Intensaun hosi Embaixada España iha Jakarta ne’e hatudu katak ami preokupa ho Timor-Leste, tanba ne’e mak ami sei mai filafila tuir ami bele,” nia adianta.
Jornalista : Arminda Fonseca
Editora : Julia Chatarina
