INETL, I.P hasoru dezafiu neen durante hala’o knaar
DILI, 13 jullu 2023 (TATOLI)–Prezidente Institutu Nasionál Estatístika Timor-Leste, Institutu Públiku (INETL, I.P), Elias dos Santos Ferreira, hateten, institutu ne’e hasoru dezafiu neen durante hala’o knaar.
“Dezafiu sira ne’e mak hanesaun rekursu umanu limitadu tebes, ezemplu iha munisípiu ema entre 3 to’o 5 de’it, alende ne’e barreira lingua tanba servisu estatístika liga ba lingua ingleza, orsamentu sentralizada iha Diresaun Jerál Serviso Kooperativu iha Ministeriu Finansa, dadus administrativu iha liña ministériu ladun apoia, balun laiha treinamentu ba funsionáriu no menus infraestritura bázika ba IT,” Prezidente INETL, I.P hateten iha programa live streaming entrevista eskluziva, iha estúdiu Agência Tatoli, Farol, kinta ne’e.
Notísia relevante : Governu aprova Dekretu-Lei ba kriasaun INETL, I.P
Maski nune’e, jerente institutu ne’e admite sempre iha solusaun ba dezafiu sira ne’e maibé importante maka alokasaun orsamentu sufisiente.
Atu solusiona dezafiu sira ne’e maka iha ona akordu ho ABS Austrália, ne’ebé liga liu ba área estatístika, ekonomia no treinamentu ba lideransa.
Aleinde ne’e, iha mós akordu ho Badan Pusat Statistik Jakarta (Indonézia), ne’ebé liga liu ba rekursu umanu. Iha tinan 10 liubá polítika Ministériu Finansa rekruta joven sira bá eskola iha Sekolah Tinggi Ilmu Statistik Jakarta.
“Oras ne’e INETL, I.P iha ona graduadu hamutuk 24, ne’ebé hosi númeru ne’e iha na’in-lima mak finaliza ona mestradu. Tinan ne’e haruka tan 15 ba eskola iha Sekolah Tinggi Ilmu Statistik iha Jakarta, kontinua hala’o treinamentu iha rai-laran no rai-li’ur, planu atu rekruta funsionáriu hodi koloka iha postu administrativu hotu hodi bele apoia dadus ba autoridade lokál sira tanba Governu iha planu atu halo desentralizasaun servisu ba kraik,” nia dehan.
Jornalista : Antónia Gusmão
Editora : Julia Chatarina
