Funsionáriu públiku mantein dixiplina no serbi povu ho di’ak
COVALIMA, 14 jullu 2023 (TATOLI)–Sekretáriu Administrasaun Munisípiu Covalima, Francisco de Jesus Alves, hateten komemorasaun loron funsaun públika ne’ebé kada tinan selebra iha 15 jullu ne’e, husu ba funsionáriu públiku sira hanesan servidór Estadu atu mantein dixiplina no kaer metin regra sira hodi serbi povu ho di’ak.
Notísia Relevante: Governu inisia atividade komemorasaun loron Funsaun Públika ba dala-IX
“Ita funsionáriu públiku mak sai uma na’in ba servisu administrasaun Públiku iha nasaun Timor-Leste. Maske polítiku sira kada tinan lima no lideransa sira troka malu, maibé hanesan funsionáriu públiku mantein dixilina no serbi nafatin povu ho di’ak, nune’e bele to’o ita-nia objetivu,” Francisco de Jesus Alves hateten liuhosi nia diskursu hafoin ramata marsa saudavél iha resintu AMC, Sukaer Laran, sesta ne’e.
Atu komemora loron funsaun públiku bad ala-IX ne’e, autoridade Covalima ne’ebé lidera hoi Administradór Munisípiu Covalima akompanadu hosi eis depudatu Alexandrino Cardoso, Sekretáriu Administrasaun hamutuk ho funsionáriu públiku ho atividade marsa saudavél.
Atividade marsa saudavél ne’e la’o ain hahú hosi resintu Administrasaun Munisípiu Covalima (AMC) to’o iha rotunda kampu Ladi depois fila mai iha resintu Administrasaun Munisípiu Covalima.
Iha nia diskursu, Sekretáriu Administrasaun Munisípiu Covalima, Francisco de Jesus Alves hateten, loron funsaun públika ba dala-IX ne’ebé monu iha loron 15 fulan-jullu tinan 2023 ne’e, autoridade Cpvalima deside hodi komemora ho atividade marsa saudavél.
“Ohin ita komemora loron Funsaun Públika ne’ebé sei monu iha loron sábadu, nune’e ohin ita komemora ho atividade marsa saudavél,” nia dehan.
Hafoin ramata atividade marsa saudavél, kontinua realiza atividade animasaun hodi hatudu atrasaun, lee poema no bidu tais mutin.
Notísia Relevante: Prezidente KFP espera Governu foun prioritiza idade serbisu efetivu funsaun públika
Jornalista : Celestina Teles
Editór :Cancio Ximenes
