PN deside debate programa IX Governu Konstituisionál iha 18 jullu

DILI, 14 jullu 2023 (TATOLI)—Prezidente Parlamentu Nasionál, Maria Fernanda Lay, hateten iha reuniaun líder bankada Parlamentár sesta (14 jullu) ne’e deside sei realiza debate ba programa IX Governu Konstitusionál iha tersa (18 jullu 2023) semana oin.
Debate ne’e sei partisipa direta hosi Primeiru-Ministru (PM), Kay Rala Xanana Gusmão, ho membru IX Governu Konstitusionál sira.
Notísia Relevante: IX Governu Konstitusionál submete ona programa ba PN
“Ohin, reuniaun líder bankada nian ami ko’alia liu liga ho programa IX Governu ne’ebé horisehik entrega tiha ona, ami determina debate hahú iha tersa (18 jullu 2023) semana oin, ne’ebé hala’o durante loron tolu,” Prezidente PN ne’e hateten ba jornalista sira hafoin reuniaun lidér bankada iha PN, sesta ne’e.
Tanba ne’e, Prezidente Parlamentu Nasionál suspende tiha reuniaun plenária iha loron segunda (17 jullu 2023), nune’e Deputadu sira bele halo leitura ba dokumentu programa Governu molok hala’o debate iha tersa (18 jullu 2023) semana oin.
Pedidu debate programa IX Governu mai Parlamentu Nasionál ho karáter normál no tuir rejimentu PN ba debate programa Governu labele liu loron lima. nune’e sei hala’o debate iha semana oin durante loron tolu nia laran tolu (18-20 jullu) nia laran de’’it.
Iha parte seluk, Prezidente PN ne’e hateten PN mós hein Governu bele aprezenta Orsamentu Retifikativu hafoin finaliza debate programa.
“Orsamentu Retifikativu hodi Governu responde dezastre naturál no asuntu seluk tuir Governu,” nia dehan.
Enkuantu, iha loron 13 jullu ne’e Governu liuhosi Vise Ministru Trata Asuntu Parlamentár, Adérito Hugo da Costa, submete ona programa IX Governu Konstituisional ba Parlamentu Nasionál atu bele hala’o debate no aprovasaun.
Programa IX Governu nian ne’e, simu direita hosi Prezidente Parlamentu Nasionál, Maria Fernanda Lay, iha gabinete PN.
PM Xanana: “Loron 120 sei anula lei kria munisípiu Ataúro-konsolida pás”
Jornalista : Nelson de Sousa
Editór : Cancio Ximenes

