PN hein Governu submete kandidatu Komisáriu CAC
DILI, 14 jullu 2023 (TATOLI)—Prezidente Parlamentu Nasionál, Maria Fernanda Lay, hateten hein IX Governu konstituisional submete kandidatu ba Komisáriu Komisaun Anti-Korrupsaun (CAC, siglá portugés) ba Parlamentu Nasionál.
Notísia Relevante: Bankada CNRT nafatin prefere kandidatu komisáriu CAC ema imparsiál
“Seidauk tambá kandidatu proposta hosi Governu, klaru Governu seidauk haruka mai. Ha’u lahatene, se sira atu separa PCIC ho CAC tenke iha alterasaun, ida-ne’e vontade Governu nia no inisiativa ne’e tenke mai hosi Governu. Tanba, kandidatu ne’e bazeia ba proposta Governu nian tuir lei haruka,” nia hateten ba jornalista sira iha uma fukum Parlamentu Nasionál, sesta ne’e.
Tanba ne’e, PN hein Governu bele submete pedidu kandidatu komisáriu CAC foun mai, hafoin PN ajenda ba eleisaun iha reuniaun plenária.
Antes ne’e, iha VIII Governu Konstitusionál haruka ona kandidatu komisáriu CAC, José Ximenes (eis Prokuradór Jerál Repúblika) ba PN maibé iha lejislatura dalimak meza PN ajenda iha reuniaun plenária liu dala neen, maibé labele realiza hodi adia tanba funsionamentu deputadu la prienxe korum.
Iha biban ne’eba, Deputadu hosi bankada opozisaun CNRT maiória auzente tanba tuir sira presiza diskute didi’ak kandidatu ba komisáriu CAC hodi haree ema ne’ebé independente, entaun labele realiza eleisaun ba kandidatu komisáriu CAC to’o VIII Governu KOnstitusionál ho PN iha lejislatura dalimak nia mandatu ramata.
Prezidente PN ne’e hateten, mezmu komisáriu CAC agora laiha maibé instituisaun CAC ninia serbisu la’o nafatin, la’ós tanba komisáriu CAC durante ne’e laiha serbisu la la’o, maibé CAC agora halo hela intervensaun ba kazu sira.
Notísia Relevante: Eleisaun komisáriu CAC foun bele kontinua iha lejislatura foun
Jornalista : Nelson de Sousa
Editór : Cancio Ximenes
