Governu tau prioridade ba elaborasaun polítika ekonomia azul
DILI, 18 jullu 2023 (TATOLI)–Programa IX Governu Konstitusionál sei kontinua implementa kampaña ‘Ha’u nia Tasi, Ha’u nia Timor’, atu sensibiliza área marrítima no sei fó prioridade ba elaborasaun polítika ekonomia azul.
“Fó prioridade ho hanoin ba kresimentu sustentável ba nasaun inklui prezervasaun, konservasaun no uzu sustentável rekursu oseanu inklui ba promosaun inisiativa no programa, ne’ebé tau-matan ba sustentabilidade ambientál, ekonómika no sosiál,” Primeiru-Ministru (PM), Kay Rala Xanana Gusmão, hateten liuhosi nia diskursu iha abertura diskusaun no apresiasaun programa IX Governu Konstitusionál, iha Parlamentu Nasionál, tersa ne’e.
Notísia relevante : IX Governu sei kria Fundu Veteranu
Xefe Governu dehan, polítika ne’e presiza esforsu hamutuk hosi liña ministériu no entidade públika, liu-liu sira ne’ebé hetan responsabilidade iha área agrikultura no peska, meiu ambiente, negósiu estranjeiru, petróleu, administrasaun estatál, defeza no seguransa atu asegura dezenvolvimentu di’ak no sustentável ekonomia azul.
“Programa ida-ne’e sei dinamiza setór turizmu ne’ebé sei aliña ninia estratejia ba atrasaun turístika inklui mellora promosaun produtu no oferta turístika, turizmu marrítima sustentável no ekoturizmu Timor-Leste. Estratejia ida-ne’e mós sei reforsa estratejia atu prezerva no valoriza ita-nia rekursu naturál, biodiversidade hodi salvaguarda ho di’ak meiu ambiente, terrestre marrítimu ba dezenvolvimentu ekonomia sustentável,” Xefe Ezekutivu akresenta.
Primeiru-Ministru dehan, Governu sei aposta iha dinamizasaun investimentu estranjeiru no dezenvolvimentu setór privadu nasionál, liuhosi kria kondisaun atrativa no seguru hodi redús obstákulu ne’ebé taka dalan hodi fomenta empreendedorizmu atu setór privadu nasionál no internasionál bele sai nu’udar parseiru di’ak ba Governu iha kresimentu ekonómiku.
Jornalista : Antónia Gusmão
Editora : Julia Chatarina
