iklan

NASIONÁL, HEADLINE, POLÍTIKA

IX Governu sei halo revizaun ba lejizlasaun sira inklui Lei Pensaun Vitalísia

IX Governu sei halo revizaun ba lejizlasaun sira inklui Lei Pensaun Vitalísia

Diskusaun programa IX Governu Konstitusionál ba loron dahuluk iha plenária Parlamentu Nasionál, tersa (18/07/2023). Imajen Tatoli/Egas Cristóvão

DILI, 18 jullu 2023 (TATOLI)—IX Governu Konstitusionál kompromete katak sei halo revizaun ba lejizlasaun hotu inklui ninia regulamentasaun tanba konsidera nesesária ba konsolidasaun Estadu.

Primeiru-Ministru, Kay Rala Xanana Gusmão, informa, lejizlasaun ne’ebé sei revee hanesan kria Rejiaun Administrativa Espesiál Oé-cusse Ambeno (RAEOA) no Zona Espesiál Ekonomia Sosiál Merkadu (ZEESM) atu garante iha duni separasaun podér entre entidade rua ne’e hodi estabelese autoridade foun ida iha RAEOA no sei halo reestrutura totál ba pesoál sira.

“Revee mós lei ne’ebé kria munisípiu Ataúru tanba konseitu RAEOA tenke kontinua inklui Ataúru tanba kondisaun infraestrutura no téknika sei mínimu liu atu Ataúru bele separa-an autónomamente hosi RAEOA,” Xefe Governu hateten durante aprezentasaun programa IX Governu Konstitusionál, iha planária Parlamentu Nasionál, tersa ne’e.

Notísia relevante : PM Xanana: “Loron 120 sei anula lei kria munisípiu Ataúro-konsolida pás”

Aleinde ne’e, sei revee mós Lei Organizasaun Judisiária, Lei Kámara Konta, Estatutu Magistradu Judisiál, Estatutu Ministériu Públiku, no Estatutu Defensoria Públika ne’ebé foin daudaun aprova, kuadru legál ba instituisaun iha setór seguransa interna, protesaun sivíl inklui mós lejizlasaun rodoviária no Lei Arte Marsiál.

Nune’e mós, rejime legál ba setór finanseiru hodi revoga tiha lejizlasaun ne’ebé la atualizada ona maibé nafatin ein vigó, revee mós Lei Orsamentu no Jestaun Finanseira no Rejime Aprovizionamentu inklui Kontratu Públiku hodi neineik hadi’a tiha sistema kontabilidade Estadu liuhosi ‘cash basis system’ ba fali ‘accrual basis system’.

Revee mós Lei Tributária atu introdús impostu valór akresentadu, lejizlasaun hotu ne’ebé ezistente ba Kombatente korrupsaun, Lei Pensaun Vitalísia, atu rejime ida-ne’e bele integra iha Rejime Seguransa Sosiál kontributivu kona-ba pensaun ba membru foun iha Órgaun Soberania.

Lejizlasaun ne’ebé regulamenta Lei Baze no Planu Nasionál Ordenamentu Territóriu ne’ebé foin hetan aprovasaun, kuadru jurídiku ba organizasaun no funsionamentu Autoridade Munisipál sira no Administrasaun Munisipál hodi fó kontinuidade ba estratejia atu ba desentralizasaun administrativa, no mós aproveita atu aprova regulamentasaun kona-ba Lei Poder Lokál no Desentralizasaun Administrativa, Lei Eleitorál Munisipál, inklui Lei Finansa Munisipál.

“Iha loron 120 mai ne’e, ami mós sei loke Auditoria imediata ba RAEOA no ZEESM nune’e mós Auditoria ba instituisaun Estadu sira seluk hanesan Tribunál Konta, Komisaun Antí-Korrupsaun, Ministériu Públiku, Komisaun Funsaun Públika, Inspesaun Jerál Estadu, no ba órgaun administrasaun eleitorál, inklui mós auditoria ba negósiu ka kontratu ne’ebé Governu anteriór halo iha ona finál mandatu. Ita labele ko’alia kona-ba Estadu Direitu, se ita la temi mós justisa no Estadu Direitu só bele iha, bainhira justisa kaer nia surik ho abilidade hanesan bainhira sukat ka tetu iha balansu justisa-nian,” Xanana tenik.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!