DILI, 18 jullu 2023 (TATOLI)-–Primeiru-Ministru (PM), Kay Rala Xanana Gusmão, hateten, IX Governu halo esforsu atu lori kadoras mai Timor-Leste nune’e bele fó solusaun ekonómikamente viável no seguru.
“Dezenvolvimentu Kosta Súl sei sai sentru atividade iha setór petróleu no gás naturál, ho estabelesimentu baze lojístika iha Suai. Hanesan mós refinaria petrolífera ida nomós kompletu petro-kímiku iha Kosta Súl inklui instalasaun fábrika ba gás naturál likifeitu no gás ne’ebé sei mai hosi Greater Sunrise liuhosi konstrusaun gazodutu hosi tasi okos to’o rai-maran,” Xefe Governu hateten liuhosi diskursu iha ámbitu diskusaun no apresiasaun programa IX Governu Konstitusionál ba loron dahuluk iha Parlamentu Nasionál, tersa ne’e.
Notísia relevante : TL-Austrália sei halo patrullamentu konjuntu iha Kosta Súl
Nia dehan, projetu tasi mane sei mosu dezenvolvimentu iha Kosta Súl tomak, ho konstrusaun sidade foun no apoia infraestrutura.
“La’ós de’it esplorasaun, maibé iha ona faze konstrusaun no faze operasaun infraestrutura, nune’e servisu ne’ebé sei mosu tan mak sei kria postu traballu direta no indireta liu 50.000,” nia akresenta.
Governu konsidera katak país tomak sei hetan benefísiu hosi projetu ida-ne’e, la’ós de’it aumentu Produtu Internu Brutu (PIB), maibé kona-ba dinámika ekonómika ne’ebé fó ba produtividade hosi fatór ekonómika oin-oin, inklui mós subkontrasaun servisu hanesan restaurante, enjeñaria, seguransa, fornesimentu kombustível, servisu jestaun profisionál no tékniku, inklui nesesidade iha produtu agríkola.
Jornalista : Antónia Gusmão
Editora : Julia Chatarina
