DILI, 18 jullu 2023 (TATOLI)—Parlamentu Nasionál (PN) ho Governu,tersa ne’e, hahú debate programa IX Governu Konstituisionál.
Notísia Relevante: PN deside debate programa IX Governu Konstituisionál iha 18 jullu
Tuir ajenda ne’ebé Agência Tatoli asesu hosi PN katak, ba apresiasaun programa Governu IX Governu konstituisionál ninia giaun (artigu 108 no 109 konstituisaun ho artigu 136 iha rejimentu PN) debate faze obrigatóriu.
Hanesan dokumentu ne’ebé konsta programa Governu aprezenta hosi Primeiru-Ministru no distribuisaun ba deputadu hotu iha loron 13 fulan-jullu tinan ne’e no reuniaun plenária dahuluk apresia programa Governu durante loron tolu hahú hosi 18-20 jullu 2023, no debate hahú iha tuku 09h00 dadeer.
Debate ne’e hahú iha tersa (18 jullu 2023) ho aprezentasaun hosi Primeiru-Ministru, Kay Rala Xanana Gusmão tempu másimu minute 40 no iha tempu adisionál.
Tuir mai, pergunta no resposta ba bankada parlamentár kada loron debate ho tempu globál fixu ho minutu hanesan hosi parte Governu 195, CNRT 93, FRETILIN 57, PD 18, KHUNTO 15 no PLP 12, ho totál minutu 390 (oras 6 no minute 30).
Tempu globál atribui kada bankada parlamentár no Governu, ba kada loron debate, jere própriu, deskonta tempu kada Deputadu uza tempu ho totál ne’ebé iha respetiva bankada no kada membru Governu ho tempu globál atribui ba Governu.
Iha finál debate meza fó tempu ba líder bankada parlamentár no Primeiru-Ministru, Kay Rala Xanana, hodi hala’o deklarasaun finál hosi tempu másimu minutu 10.
Mosaun rejeisaun ka votu konfiansa, to’o enseramentu debate bankada parlamentár aprezenta mosaun rejeisaun programa Goveru ou Governu solisita aprosaun votu konfiansa.
Hafoin ne’e, Prezidente Parlamentu Nasionál komunika rezultadu ba Prezidente Repúblika konforme artigu 86 no alínea (e) iha númeru 1 artigu 112 konstituisaun.
Iha debate ne’e, sei prezide direta hosi Prezidente Parlamentu Nasionál, Maria Fernanda Lay.
Enkuantu iha loron 13 jullu, Governu liuhosi Vise Ministru Asuntu Parlamentár, Adérito Hugo da Costa, submete programa IX Governu konstituisionál ba Parlamentu Nasionál.
Progarma Governu ne’e simu direta hosi Prezidente Parlamentu Nasionál, Maria Fernanda Lay iha nia gabinete Paralmentu Nasionál.
Programa IX Governu kompoen área prinsipál neen hanesan reafirmasaun Estadu diretu demokrátiku, kontinua ho dezenvolvimentu hosi kapitál sosiál, kontinua ho dezenvolvimentu infraestrutura, kontinua ho dezenvolvimentu ekonómiku, kontinua ho konsolidasaun Governantiva no boa-governasaun no kombate hasoru korrupsaun.
Notísia Relevante: PM Xanana: “Loron 120 sei anula lei kria munisípiu Ataúro-konsolida pás”
Jornalista : Nelson de Sousa
Editór : Cancio Ximenes
