DILI, 19 jullu 2023 (TATOLI)-–IX Governu Konstitusionál halo ona levantamentu orsamentu millaun $300 hosi fundu mina-rai hodi sustenta despeza Estadu.
Vise-Ministru Finansa, Helder Lopes, hateten, bazeia ba orsamentu ne’ebé aprova hosi Parlamentu Nasionál, Governu anteriór liuhosi Ministériu Finansa halo ona lavantamentu hosi fundu mina-rai dala-rua iha tinan-ne’e, ne’ebé levantamentu daruak ne’e liu ona Rendimentu Sustentável Estimadu (RSE).
“Entaun tuir lei katak bainhira atu halo tan levantamentu tenke informa ba Parlamentu Nasionál, depois hato’o pedidu ba Banku Sentrál hodi sira bele foti osan hosi fundu hodi finansia despeza Estadu. Levantamentu ne’e halo ona hamutuk millaun $300, osan ne’e iha ona konta tezouru,” Vise-Ministru Finansa informa ba Agência Tatoli, iha Parlamentu Nasionál, kuarta ne’e.
Notísia relevante : Fundu mina-rai trimestre ikus ho kapitál biliaun $16,91
Nune’e, governante ne’e garante katak ho levantamentu ne’e Governu iha osan sufisiente iha konta tezouru hodi asegura despeza Estadu nian.
Antes ne’e, Governu anteriór halo ona levantamentu fundu mina-rai hamutuk millaun $490, hosi totál osan ne’ebé aprova iha Parlamentu Nasionál hamutuk millaun $1,3.
Montante OJE 2023 aprovadu hamutuk biliaun $2,16, ne’ebé bazeia ba relatóriu hosi Ministériu Finansa, iha mandatu ikus VIII Governu, to’o 24 juñu 2023, ezekusaun reál ba Governu tomak esklui kompromisu no obrigasaun sira millaun $552, enkuantu ezekusaun reál ba administrasaun sentrál millaun $529 hosi totál orsamentu alokadu biliaun $1,8, enkuantu Autoridade RAEOA – ZEESM ezekuta ona millaun $22,6 hosi orsamentu alokadu millaun $120.
Jornalista : Antónia Gusmão
Editora : Julia Chatarina
