IX Governu sei aprezenta Orsamentu Retifikativu ba PN
DILI, 20 jullu 2023 (TATOLI)—Vise Ministru Asuntu Parlamentár, Adérito Hugo da Costa, hateten IX Governu Konstituisionál sei aprezenta Orsamentu Retifikativu (OR) 2023 ba iha Parlamentu Nasionál (PN).
Notísia Relevante: IX Governu mantein biliaun $2,1 iha Orsamentu Retifikativu OJE 2023
“Sekuénsia sira depois pose IX Governu nian hanesan mós pose ba governasaun sira anteriór, segundu sekuénsia depois pose la liu loron 30 Governu ne’ebé pose ona tenke aprezenta ninia programa, entaun programa aprezenta ona no PN aprova ona. Sekuénsia tuir mai mak Governu sei aprova dekretu-lei organika IX Governu nian ne’e hotu, tama ona ba Orsamentu Retifikativu (OR) submisaun,’’Vise Ministru Asuntu Parlamentár, Adérito Hugo da Costa, hateten ba Agência Tatoli liuhosi entervista iha transmisaun direta ba debate no apresiasaun programa IX Governu konstituisionál loron daruak iha Parlamentu Nasionál, kuarta (19 jullu 2023) ne’e.
Tanba, nia hatutan, síklu aprezensaun ba orsamentu anual nian tuir mudansa ne’ebé halo iha lei enkuadramentu orsamentál no mós lei grande opsaun planu ninian, entaun iha mudansa síklu aprezentasaun proposta orsamentu, no IX Governu depois pograma hotu sei produs fali lei organika IX Governu nian no ida seluk mak Orsamentu Retifikativu (OR) 2023 nian.
Imediatamente, depois Orsamentu Retifikativu atu ajusta de’it ho estrutura organigrama foun IX Governu nian ne’ebé diferensa utoan ajusta de’it ho mós iha espasu fiskál balun ne’ebé Governu foun ne’e bele ajusta orsamentu 2023 la aumenta, ajustamentu tanba iha mudansa organograma nian hodi sustenta despeza sira to’o fulan dezembru.
“Governu mós depois Orsamentu Retifikativu aprezenta no aprova, imediatamente tenke hatama tan ona planu Orsamentu Jerál Estadu (OJE) 2024, ne’ebé tuir lei orsamentu jestaun finansa tenke aprezenta iha loron 01 outubru, entaun iha tempu badak ne’e IX Governu tenke mai kedas ho sekuénsia sira temi ona,” nia hateten.
Notísia Relevante: PN aprova programa IX Governu ho apresiasaun unanimidade
Jornalista : Nelson de Sousa
Editór : Cancio Ximenes
