DILI, 24 jullu 2023 (TATOLI) – Ekipa konjunta kompostu hosi Polísia Nasionál Servisu Investigasaun Kriminál (PNSIK) no Servisu Nasionál Intelejénsia (SNI), halo apreensaun ba sasan kontra bandu hanesan sigaru ho tipu Surya 12 hamutuk karon-neen iha área Suku Lisbutak, Munisípiu Díli.
Sigaru ilísitu sira ne’e, sidadaun timoroan feto ida ho insiál EMD (20) no mane ho insiál BTA (32) mak hatama hosi Indonézia liuhosi maritima no tama iha área Palaka, Aldeia Sanirin, Postu Administrativu Balibo no Munsípiu Bobonaro.
Bainhira sasan kontra bandu sira ne’e tama mai, suspeitu na’in-rua ne’e transporta kedan sasan sira ne’e mai iha Díli hodi tau iha nia uma Lisbutak atu halo tranzasaun tutan ba merkadu.
Maibé bainhira sasan sira ne’e to’o iha suspeitu nia uma Lisibutak, ekipa konjunta tuir kedan, hodi halo aprensaaun ba sasan sira ne’ebé mak suspeitu sira lori hosi Palaka.
Hafoin halo tiha apreensaun ba sasan sira ne’e, ekipa konjunta haree katak sigaru ilísitu ho karon-neen, suspeitu hatama liuhosi dalan ilegál no konsidera sasan sira ne’e nudar objetu kontra bandu, nune’e ekipa konjunta lori kedan ba Departemnentu Investigasaun Kriminál (DIK) hodi submete ba prosesu identifikasaun.
DIK rejista kazu ne’e ho númeru prosesu kriminál NUK: 0209/23.PNSIK, ho krime kontra bandu ne’ebé previstu iha artigu 316 hosi kódigu penál Timor-Leste.
“Ha’u seidauk bele fó komentáriu ba kazu ne’e, tanba kazu ne’e rasik sei iha hela prosesu identifikasaun. Kuandu konklui ona identifikasaun, ha’u sei enkamiña prosesu sira ne’e ba Komandu Jerál PNTL depois Portavós Relasaun Rúblika Komadu Jerál PNTL mak sei koalia ho imi”, Xefe DIK Superintendente Polísia João Belo hateten ba TATOLI iha Komandu Jerál PNTL, Caicoli, segunda ne’e.
Tuir observasaun TATOLI nian iha terenu katak suspeitu EMD no BTA sei submete hela ba prosesu identifikasaun inklui karreta ne’ebé mak ho marka Land Cruser tula sasan kontra bandu sigaru ilísitu karon hosi Palaca, Balibo mai Díli mós PNTL asegura hotu hodi submete ba prosesu.
Jornalista; Natalino Costa
Editór : Zezito Silva
