Governu halo levantamentu dadus ba presu foos sa’e iha Covalima
COVALIMA, 28 jullu 2023 (TATOLI)–Governu liuhosi Ministériu Turizmu Komérsiu no Indústria (MTCI) Covalima, sesta ne’e, halo levantamentu dadus ba presu foos sa’e iha merkadu Debos, postu administrativu Suai, munisípiu Covalima.
Notísia Relevante: Autoridade Covalima sei orienta SMJT kontrola presu foos iha merkadu Debos
“Bazeia ba ami halo levantamentu dadus presu foos iha merkadu Debos la normál tanba foos kilograma 25 ho nia presu antes ne’e $12.00 ne’e agora sa’e ona ba $17.00, maibé presu sasan sira seluk normal,” Funsionáriu Ministériu Turizmu Komérsiu no Indústria (MTCI) Covalima, Vitrico Brito da Silva, hateten ba Agência Tatoli iha merkadu Debos.
Presu foos sa’e tanba impaktu hosi impostu importa sasán sa’e, nune’e halo mudansa ba presu foos sa’e iha merkadu Debos.
Bazeia ba levantamentu dadus presu foos kilograma 25 ho nia presu $17.00 no foos kilograma 20 ne’e ho presu $14.00, ne’ebé presu ne’e la normal.
“Ita espera Governu agora bele redús impostu, nune’e labele fó impaktu ba presu foos iha merkadu sira, nune’e negosiánte sira faan tuir presu normal,” nia dehan.
Kioke nain, Martinha de Araújo, hateten nia parte faan foos kilograma 25 ho nia presu $17.00 tanba presu foos iha nasionál mós sa’e ho presu sosa nian ne’e $16.00, nune’e faan fali merkadu Debos ne’e ho presu $17.00 hodi hetan netik lukru $1.00.
“Ami faan foos presu sa’e tanba ami sosa iha dili foos kilograma 25 nia presu $16.00, entaun mai iha munisípiu ami tenke faan ba $17.00, entaun ami hetan lukru $ 1.00, no la’ós ami mak tuur no tuur hakarak hasa’e presu foos,” Martinha de Araújo hateten.
Tuir observasaun jornalista Agência Tatoli nota katak presu nesesidade bázika hanesan foos kilograma 25 mak sa’e hosi $12.00 ba $17.00, foos kilograma 20 ho presu $11,00 sa’e ona ba $14.00, mina Bimoli litru tolu (3) nian ne’e ho presu $3,50 no litru lima (5) ho nia presu $7,50 sentavus.
Antes ne’e, komunidade iha postu administrativu Fatululik, munisípiu Covalima mós preokupa tanba presu foos kilograma 25 antes presu $16.00 agora sa’e ba $20.00.
Notísia Relevante: MTKI konsidera empreza balun halo espekulasaun presu sasán
Jornalista : Celestina Teles
Editór : Cancio Ximenes
