ADB no Embaixadór Japaun vizita instalasaun projetu CALIP

DILI, 02 agostu 2023 (TATOLI)–Diretora Banku Dezenvolvimentu Aziatiku (ADB, sigla portugés), Stefania Dina hamutuk ho Embaixadór Japaun iha Timor-Leste, Tetsuya Kimura, kuarta ne’e, halo vizita ba fatin instalasaun projetu ho naran Coffee and Agroforestry Livelihood Improvement Project (CALIP), ne’ebé lokaliza iha munsípiu Ermera.

“CALIP hanesan projetu inovativu ida atu hadi’a kondisaun moris no seguransa ai-han ba agrikultór kafé sira iha Timor-Leste inklui apoia Ministériu Agrikultura, Pekuária, Peska no Floresta hodi estabelese sistema produsaun kafé no agroflorestál ne’ebé produtivu liu, hadi’a kualidade kafé no ligasaun merkadu, inklui hasa’e koordenasaun setór kafé nian,” refere nota ne’ebé Agência Tatoli asesu, kinta ne’e.

Notísia relevante : ADB kontinua apoiu dezenvolvimentu Timor-Leste

CALIP hetan finansiamentu hosi Fundu Japaun ba Prosperu no Reziliénte Ázia no Pasífiku, ne’ebé hanesan subsídiu hosi Japaun no administrasaun hosi ADB.

Delegasaun vizita fatin sentrál iha Fatuqero, ne’ebé hanesan fatin prodús kafé, ai-fuan no ai-mahon hodi fahe ba agrikultór sira, fatin prosesamentu kafé iha Apidou ne’ebé agrikultór sira prosesa variedade oin-oin inklui métodu tratamentu ba reabilitasaun kafé implementa mós iha fatin ne’e.

Nune’e mós, iha fatin prosesamentu kafé iha Lisapat, agrikultór sira hetan formasaun no prátika métodu produsaun kafé ne’ebé di’ak liu.

Embaixadór Kimura sente kontente tanba projetu ne’e servisu hamutuk ho agrikultór no komunidade sira, nune’e hein atu hadi’a tan produsaun kafé no agrikultór sira-nia moris iha futuru.

Delegasaun ADB mós vizita formasaun Barista ne’ebé organiza hosi Asosiasaun Kafé Timor (ACT) ne’ebé hetan apoia mós hosi projetu CALIP.

Jornalista     : Antónia Gusmão

Editora          : Julia Chatarina