MAKLN-BRI kontinua hametin kooperasaun fó kréditu ba veteranu sira

DILI, 02 agostu 2023 (TATOLI)—Ministériu Asuntu Kombatente Libertasaun Nasionál (MAKLN) ho Bank Republik Indonesia (BRI), tersa ne’e, enkontru hodi kontinua hametin kooperasaun iha área kreditu, tanba antes ne’e asina ona memorandu fó kreditu ba veteranu sira iha Timor-Leste.
Notísia Relevante: Obrigasaun kréditu, BNCTL husu veteranu labele hamamuk saldo iha konta
“Ohin, BRI mai komprementa ami tanba uluk ha’u sei Sekretáriu Estadu Asuntu Kombatente Libertasaun Nasionál, BNCTL ne’ebé primeiru rai veteranu nia fundu konstributivu $30 kada fulan ne’e, maibé ikus mai BRI mós loke odamatan ba fundu ida-ne’e nune’e depois ita mós bele tau osan. Tanba, iha tinan 2021, ha’u sei hanesan Sekretáriu Estadu hodi selebra no asina ona memorandu ida no ohin sai hanesan Ministru, entaun sira mai hodi komprementa,” Ministru Asuntu Kombatente Libertasaun Nasionál (MAKLN), Gil da Costa “Oan Soru”, hateten ba Agência Tatoli, hafoin ramata enkontru ho BRI iha edifísiu MAKLN, Caicoli.
Ekipa BRI mai hodi kontinua halo kooperasaun no servisu hamutuk liga ba kréditu nian, tanba veteranu sira-ne’ebé hetan kréditu hosi BNCTL no mós BRI hamutuk 7.725 mai kraik.
“Kona-ba kréditu ne’e, ita la haree ba nia grau maibé ita bazeia ba simu pensaun hira no bazeia ba nia pensaun nune’e fó kreditu 50%,” nia dehan.
Business Manager BRI iha Timor-Leste, Carlos Oliveira, hateten ohin mai komprementa de’it Ministru Asuntu Kombatente Libertasaun Nasionál (MAKLN), Gil da Costa “Oan Soru”, tanba kooperasaun entre parte rua la’o ona iha tinan rua liubá ne’e.
“Tuir loos ne’e ita ho Ministru servisu hamutuk ona bainhira nia sei Sekretáriu Estadu Asuntu Kombatente Libertasaun Nasionál, entaun ohin mai atu kontinua ho parte BRI ho Asuntu Veteranu durante tinan rua liubá ne’e,” nia dehan.
Iha future, BRI nafatin apoiu programa Konsellu Kombatente Libertasaun Nasionál no mós ba individu veteranu sira.
“Ami-nia esperansa ba oin ne’e bele kontinua servisu hamutuk tantu atende veteranu ne’ebé foti kréditu iha BRI. Aleinde fó kréditu ba veteran, ami mós halo jestaun ba fundu veteranu ne’ebé fó fiar ba BRI. Ami espera katak ami sei fó benefísiu ne’ebé boot ba instituisaun veteranu nian,” nia hateten.
Hosi enkontru ne’e, Ministru fó mensajen labele lakon esperansa maibé hamutuk hodi esforsu ba oin mezmu neineik maibé hamutuk nafatin esforsu hodi kontinua tenta ba oin.
Notísia Relevante: Fundu kontributivu veteranu millaun $34 iha konta veteranu
Jornalista : Osória Marques
Editór : Cancio Ximenes

