PDHJ-Autoridade Bobonaro hametin komunikasaun iha asuntu rua
MALIANA, 02 agosto 2023 (TATOLI) – Provedoria Direitu Humanu no Justisa, tersa ne’e halo vizita kortezía ba Autoridade Munisípiu Bobonaro (AMB) no diretór liña ministeriál no delegasaun territoriál sira hodi hametin liña komunikasaun ba asuntu direitu umanu no boa governasaun.
Notísia relevante PDHJ buka hatene dezafiu ne’ebé Autoridade RAEOA enfrenta no presiza garante boa governasaun
“Ha’u hanesan provedór foun ne’ebé hahú ona halo vizita ba delegasaun territoriál sira iha RAEOA, Baucau, agora mai iha Bobonaro, ohin ha’u halo introdusaun hanesan provedór no saida mak provedór foun hakarak halo durante mandatu tinan haat ne’e,” Provedór Virgílio da Silva Guterres ‘Lamukan’ informa ba jornalista sira, hafoin enkontru.
Iha enkontru ne’e halo introdusaun atuasaun PDHJ sobre asuntu direitu umanu no boa governasaun, oinsá atu fó hanoin ba autoridade sira kona-bá saida de’it maka tama iha dimensaun boa governasaun liuliu abuzu podér.
“Ita ko’alia kona-bá narativa sira-ne’e ita toman ona, maibé iha aspeitu profesionalizmu Polísia dalaruma hasoru ema ho defisiénsia, ko’alia kona-ba iha aplikasaun vaga ruma, ita labele uza ona kritéria sira-ne’ebé diskriminativu,” nia katak.
Prezidente Autoridade Munisípiu Bobonaro, Ernesto de Oliveira Barreto, sente kontente no agardese, tanba vizita provedór nian fó benefísiu ba funsionariu públiku, parte seguransa membru Polísia no membru FALINIL-Forsa Defeza Timor-leste sira iha munisípiu Bobonaro.
“Ita haree iha Lei balu ke sira hala’o, maibé sira viola hela tanba sira la hatene, maibé ho prevensaun provedór nian ne’e, informasaun sira-ne’e klaru ona ba seguransa no funsionáriu sira liuliu kargus xefia sira, atu servisu karik tenke hatene koloka ninia-aan, tanba buat hotu-hotu la’o ho lei,” nia katak.
Notísia relevante: PDHJ husu TR halo fiskalizasaun abstrata ba Estatutu PNTL
Jornalista : Sérgio da Cruz
Editór : Evaristo Soares Martins
