PDHJ buka hatene dezafiu ne’ebé Autoridade RAEOA enfrenta no presiza garante boa governasaun
OÉ-CUSSE, 26 juñu 2023 (TATOLI) – Provedoria Direitu Umanu no Justisa (PDHJ, sigla portugés) buka hatene dezafiu ne’ebé Autoridade Autoridade Rejiaun Administrativa Espesiál Oé-Cusse Ambeno (RAEOA) enfrenta no presiza mantein komunikasaun no supervizaun ba asuntu boa-governasaun.
Notísia relevante: Virgílio Guterres ‘Lamukan’ eleitu sai Provedór PDHJ períodu 2023-2026
Provedór Direitu Umanu no Justisa, Vírgilio Guterres ‘Lamukan’ propoin asuntu rua ne’e, hafoin enkontru kortezía ho Autoridade RAEOA lideradu Arsénio Paixão Bano, iha salaun Gabinete Prezidente Autoridade iha Oébau, Oé-Cusse, segunda ne’e.
“Primeiru mai vizita kortezía tanba depois tomada pose, estrutura PDHJ nian, prioridade mak oinsá atu identifika internalmente instituisaun sira, entaun ida mak vizita kortezía mai RAEOA, alende atu hasoru Autoridade RAEOA atu identifika dezafiu saida maka sira enfrenta iha Oé-Cusse,” Provedór Vírgilio Guterres informa.
PDHJ nia kooperasaun ho entidade sira hotu inklui RAEOA tanba rejiaun espesiál, entaun tenke iha komunikasaun, supervizaun ne’ebé kontinua, kona-bá buat rua ne’ebé sai kompeténsia PDHJ nian, boa-governasaun no direitu umanu ninian.
Nune’e sorumutu ho Autoridade oinsá atu rezolve problema sira-ne’ebé mosu entre komunidade liuliu rai, fó komunikasaun ne’ebé di’ak ho diálogu sira-ne’ebé konstrutivu entre komunidade atu rezolve.
Iha parte seluk, kona-bá dezenvolvimentu, ne’e hanesan nesesidade nasaun nian, entaun konseitu inkluzividade, ne’e sai importante, la’ós de’it iha Oé-Cusse, maibé iha territóriu tomak, kuandu halo dezenvolvimentu, konseitu inkluzividade ne’e tama, katak fasilidade ba maluk sira-ne’ebé kondisaun defisiénsia atu asesu ba dalan, edifísiu, hariis-fatin iha edifísiu laran ne’e tenke garante.
“Ida-ne’e maka ohin ami fahe hanoin hamutuk ho Autoridade RAEOA, no Autoridade sira mós kompromete, sei kontinua la’o, atu koopera hamutuk, liuliu atu hadi’a, neineik maibé beibeik prátika boa-governasaun ninian no mós redús violasaun direitu umanu iha prosesu konstrusaun Estadu ida-ne’e,” nia katak.
Notísia relevante: PDHJ Oé-Cusse rejista kazu violasaun boa-governasaun 11 iha 2022
Prezidente Autoridade RAEOA, Arsénio Paixão Bano, agradese ba vizita kortezía hosi PDHJ, no iha ámbitu enkontru kortezía ne’e, Arsénio Bano relata progresu serbisu ne’ebé autoridade presta ona ba povu Oé-Cusse, hanesan prosesu distribuisaun cesta bázika, implementasaun infraestrutura bázika no fasilidade ba ema ho defisiénsia.
“Primeiru hato’o serbisu sira-ne’ebé durante ne’e ita halo iha Oé-Cusse inklui prosesu distribuisaun sesta bázika nian, iha Oé-Cusse intervensaun PDHJ di’ak tebes, atu asegura distribuisaun ne’e bele minimiza problema,” nia orgullu.
Parte daruak, Autoridade nia envolvimentu iha serbisu seluk asegura komunikasaun ba rai nian, tanba prosesu atu halo indemnizasaun ba komunidade afetadu ne’ebé afeta hosi mega projetu ZEESM, liuliu ba asuntu rai nian prosesu daudaun ne’e la’o hela.
“Prosesu ba uma troka uma ne’e, ita prepara hela, dezeñu aprovizionamentu ita halo ona, uma 34 ne’e atu hahú, hela balu tanba ita sei troka uma 120 entre rai afetadu ba konstrusaun estrada nasionál Pante Makasar ba Oénunu, Nítibe inklui ai produtiva sira, no iha rekomendasaun sira, ita hahú halo ona ba fasilidade ba defisiénsia, hanesan eskola no edifísiu ita halo ona kondisaun hodi fasilita defisiénsia bele hetan asesu dignu,” nia katak.
Notísia relevante: Arsénio Bano husu PDHJ-CAC akompaña prosesu distribuisaun cesta bázika iha Oé-Cusse
Jornalista : Abílio Elo Nini
Editór : Evaristo Soares Martins
