DILI, 07 agostu 2023 (TATOLI)—Deputadu bankada KHUNTO iha Parlamentu Nasionál, Luís Roberto, husu autoridade kompetente liuhosi Alfandega atu kontrola másimu sigaru ilegál ne’ebé kontinua sirkula makaas iha liña fronteira tama iha Timor-Leste.
Notísia Relevante: Ekipa konjunta halo apreensaun ba sigaru ilegál saku ualu iha Portu Tibar
“Kona-ba ita nia negosiante sira faan sigarru ilegál ne’e preokupa iha territóriu laran, hamate ita nia emprezáriu privadu sira. Depois, sira faan sigarru ilegál ne’e la selu taxa ba nasaun ida. Presiza kontrola másimu hosi ita-nia Alfandega, no polísia ho forsa sira,” nia levanta asuntu ne’e liuhosi reuniaun plenária PN, segunda ne’e.
Nia husu, Alfandeha tenke tau matan másimu, tanba se lae sigarru ilegál sira-ne’e agora tama Timor-Leste barak loos.
Vise Ministru ba asuntu Parlamentár, Adérito Hugo, hateten kona-ba jestaun fronteira ninian liga aumenta gráfiku ema halo tranzasaun illegál, parte Governu sentrál halo hela akompañamentu sériu besik liu ba situasaun sira-ne’e.
“Hanesan señor Deputadu sira hatene semana hirak liu ba, kuandu IX Governu nia orgánika entrada em vigór, semana ida-ne’e rasik, liña ministéiru komesa kompleta nia orgánika nian hanesan ne’e intervensaun halo sira bele iha ona kondisaun,” nia hateten.
Notísia Relevante: Autoridade polisiál halo aprensaaun ba sigaru illegál karon-neen
Jornalista : Nelson de Sousa
Editór : Cancio Ximenes
