OÉ-CUSSE 07 agostu 2023 (TATOLI) – Pontu Fokál Programa Bolsa da Mãe Jerasaun Foun iha iha Rejiaun Administrativa Espesiál Oé-Cusse Ambeno (RAEOA), Luis Sérgio Hanjam da Costa, hateten, pagamentu ba benefisiáriu bolsa da mãe jerasaun foun iha trimestre dahuluk hosi inan isin-rua, labarik no labarik defisiénsia hamutuk na’in 8.745 simu ona subsídiu hosi Governu.
Notísia relevante: Benefisiáriu bolsa da mãe jerasaun foun RAEOA sei simu subsídiu iha agostu
Pontu Fokál Programa Bolsa da Mãe Jerasaun Foun iha Oé-Cusse, argumenta, benefisiáriu ne’ebé rejistu iha Oé-Cusse, 9.017, sira-ne’ebé maka hetan ona arollamentu ba pagamentu 8.745, espesiál benefisiáriu labarik iha 7.182.
Nune’e mós sira-ne’ebé hetan ona aprovasaun prepara ba pagamentu hamutuk 7.020, no sira-ne’ebé durante hatama ona lizu no mós sertidaun RDTL maioria hotu ona, maibé 2.817 presiza kompleta dokumentu.
“Pagamentu ita halo ona iha trimestre primeiru ita finaliza ona, hosi janeiru iha benefisiáriu 5.071 ho totál orsamentu pagamentu $1,062.485, fevereiru benefisiáriu 6.424 ho nia orsamentu $1,072.940, iha marsu benefisiáriu hamutuk 7.202 ho totál orsamentu $1,037.835, maibé balu sei kompleta presiza kompleta dokumentu,” Luis Hanjam ba jornalista sira iha Oé-Cusse, segunda ne’e.
Kona-bá trimestre daruak, daudaun ne’e prosesa ona iha nasionál sei imprime hela lista pagamentu no halo kontajen orsamentu ba preparasaun pagamentu
Nia informa, durante ne’e obstákulu ne’ebé ofisiál sira enfrenta iha terrenu, maka dokumentu komprovativu sidadaun nian, hanesan sertidaun RDTL no kartaun eleitorál balu sedauk iha, maibé problema ne’e, parte MSSI submete ona ba iha Ministériu Justisa atu rezolve tuir mekanizmu ne’ebé iha.
Nia furdamenta, atividade rejistrasaun ba programa ne’e, hahú kedas iha juñu 2022, tanba Ministériu Solidariedade Sosiál no Inkluzaun (MSSI) destaka ona ofisiál sira hamutuk na’in-26 atu rekolla dadus kada loron iha postu saúde no sentru saúdeira iha territóriu Oé-Cusse, ba benefisiáriu sira, inan isin-rua no labarik tanba programa ne’e servisu hamutuk ho Ministériu Saúde, Ministériu Justisa no Ministériu Administrasaun Estatál (MAE).
“Iha Oé-Cusse ha’u rasik mak aprova sira-nia dadus atu hetan susbsídiu ida-ne’e no iha nasionál sira aprova no kontinua kedas imprime lista pagamentu ba kontajen preparasaun pagamentu ba benefisiáriu sira,” nia katak.
Tuir nia, bazea mata dalan hosi Governu liuhosi MSSI valór subsídiu ba inan isin-rua hetan $15 kada fulan to’o partu, no bainhira bebé ida moris to’o tinan tolu hetan subsídiu $20 kada fulan, no inan ne’e la hetan ona subsídiu maibé bebé mak hetan no estende to’o tinan neen (6).
Programa ne’e MSSI servisu hamutuk ho Ministériu Saúde atu sidadaun hotu-hotu bainhira isin-rua nia tenke asesu ba fasilidade saúde hodi hetan atendimentu, nune’e bainhira deteta rezultadu hatudu pozitivu isin-rua sei rejista iha sistema programa bolsa da mãe jerasaun foun.
Notísia relevante: MSSI estabelese komisaun diretiva pagamentu bolsa da mãe jerasaun foun
Jornalista: Abílio Elo Nini
Editór: Evaristo Soares Martins
