DILI, 07 agostu 2023 (TATOLI)–Prezidente Institutu Kualidade Timor-Leste, Institutu Públiku (IQTL, I.P sigla portugés), Rosito de Sousa Monteiro, hateten, mákina item tolu halo teste ba kualidade produtu sei to’o iha dezembru tinan ne’e.
“Ekipa aprovizionamentu agora prepara hela dokumentu no sei anúnsiu iha fulan ida-ne’e, maibé dezembru hakarak ka lakohi ita-nia mákina teste bee, kafé no mina nuu sei to’o mai,” Prezidente institutu informa ba Agência Tatoli, via telefónika, segunda ne’e.
Notísia relevante : IQTL seidauk sertifika produtu lokál molok exporta tanba laiha laboratóriu
Fulan ne’e, aleinde prepara konkursu públiku ba item tolu, IQTL mós daudaun halo prosesu atu halo konkursu públiku instalasaun laboratóriu ba mákina item tolu ne’e rasik iha Bebora, ne’ebé uluk Ministériu Justisa liuhosi Terra no Propriedade entrega ona ba institutu.
“Agora ita iha faze levantamentu kustu reabilitasaun, ne’ebé agora ita prepara nune’e bainhira sasán to’o mai ita hein hatama ba laboratóriu ka uza de’it,” nia akresenta.
Aleinde ne’e, IQTL komunika ona ho Autoridade Inspesaun no Fiskalizasaun, Atividade Ekonómika Sanitária no Alimentár, Institutu Públiku (AIFAESA, I.P) atu utiliza hotu edifísiu AIFAESA, I.P nian iha Tibar, maibé autoridade inspesaun atu estabelese hotu laboratóriu.
“Entaun IQTL deside estabelese iha Bebora ne’e. Ami hakarak halo laboratóriu integradu maibé AIFAESA, I.P hakarak ketak, entaun ami mós halo ketak. Kona-ba orsamentu atu sosa ekipamentu tolu ne’e hamutuk $105.000, sei sosa hosi Indonézia,” Prezidente institutu tenik.
Jornalista : Arminda Fonseca
Editora : Julia Chatarina
