PN anúnsia inskrisaun kandidatura ba prémiu liberdade espresaun Max Stahl 2023

DILI, 09 agostu 2023 (TATOLI)—Parlamentu Nasionál (PN), tersa (08 agostu) horisehik, anúnsia hodi loke inskrisaun kandidatura ba Prémiu Liberdade Espresaun Max Stahl iha tinan 2023.
Notísia Relevante: OPMT sai manán-na’in ba prémiu liberdade espresaun Max Stahl
“Períodu simu kandidatura interresadu sira bele submete proposta kandidatura ba júri prémiu liberdade espresaun Max Stahl 2023 iha Sekretariadu Parlamentu Nasionál, hahú loron 21 agostu to’o loron 25 fulan setembru 2023,” karta anúnsia hosi PN ne’ebé Agência Tatoli asesu, kuarta ne’e.
Prémiu liberdade espresaun Max Stahl 2023 ne’e, atu fó omenájen ba saudozu Max Stahl ninia kontribuisaun ba kauza Timor-Leste nian no promove liberdade espresaun iha Timor-Leste, Parlamentu Nasionál estabelese ona prémiu liberdade espresaun Max Stahl tuir rezolusaun Parlamentu Nasionál Númeru 25/2021, 01 dezembru, altera tuir rezolusaun Parlamentu Nasionál Númeru 38/2022, 19 dezembru.
Prémiu Liberdade espresaun Max Stahl ne’e nia objetivu mak promove, divulga no aumenta koñesimentu direitu umanu liuliu liberdade espresaun nian, no prevensaun violasaun direitu ba liberdade espresaun, prezervasaun memória luta ba independénsia nian no hasa’e koñesimentu kona-ba istória nasaun Timor-Leste no reforsa edukasaun no formasaun síviku.
Kona-ba kriteira ba selesaun atividade no traballu sira-ne’ebé bele hetan konsiderasaun ba prémiu liberdade espresaun Max Stahl tenke prienxe kriteriu sira-ne’ebé komisaun organizadora prepara mak hanesan hanesan;
Notísia Relevante: PN aprova projetu rezolusaun institui prémiu Max Stahl
Kontribui ba promosaun, divulgasaun no defeza liberdade expresaun iha Timor-Leste.
Kontribui ba prezervasaun memória luta nian, promove koñesimentu istória Timor-Leste nian no traballu sira tenke prodús iha Timor-Leste iha lian ofisiál.
Bele sai kandidatu sidadaun nasionál, estranjeiru, organizasaun naun-governamentál ka entidade sira seluk.
Kona-ba matéria sei sai baze ba selesaun ba kandidatu sira mak informasaun kona-ba atividade sira ho objetivu ne’ebé koerente objetivu prémiu nian.
Traballu individual ka koletivu mak halo iha Timor-Leste iha área jurnalístiku, literáriu, sientífiku, audiovisuál, ne’ebé koerente objetivu prémiu nian.
Kandidatu sira presiza aprezenta dokumentu hanesan kuríkulu vitae ba indivídu ka informasaun kona-ba organizasaun, ho naran kompletu ho númeru kontatu no hela fatin atuál.
Karta aprezentasaun ho motivasaun iha lian ofisiál la liu pájina rua, no informasaun ka divulgasaun kona-ba atividade, ka prova ba traballu hanesan amostra ka kópia hosi obra ka servisu ka produtu traballu ruma.
Dokumentu sira seluk ne’ebé karik relevante ba konsideraun, no deklarasaun katak dokumentu ka informasaun hatama hotu loos.
Notísia Relevante: PN aprova regulamentu atribuisaun prémiu Liberdade Espresaun Max Stahl
Jornalista : Nelson de Sousa
Editór : Cancio Ximenes

