Pagamentu idozu no invalidéz iha RAEOA, hahú uluk iha Pássabe
OÉ-CUSSE, 10 agostu 2023 (TATOLI – Koordenadór Institutu Nasionál Seguransa Sosiál (INSS), Rejiaun Administrativa Espesiál Oé-Cusse Ambeno (RAEOA), Albano de Jesus Maniquim, informa, pagamentu ba benefisiáriu terseira-idade no invalidéz iha RAEOA sei hahú uluk hosi suku Malelat, sub-rejiaun Pássabe iha segunda, 14 agostu, no sei konklui iha sub-rejiaun Pante Makasar iha loron 09 outubru 2023 ne’e.
Notísia relevante: INSS sei halo pagamentu ba idozu-invalidéz 99,564 iha 14 agostu
Albano de Jesus Maniquim, relata, kona-bá benefisiáriu terseira-idade no invalidéz iha Oé-Cusse hamutuk 7.218 ho totál valór pagamentu ne’ebé aloka hosi Governu Sentrál hamutuk $2,477,571.00, komposta hosi veliche 7.087 ho valór pagamentu $2,433,054.00 no invalidéz hamutuk na’in-131 ho valór pagamentu $44,517.00.
Hosi númeru ne’e sub-rejiaun Nítibe benefisiáriu hamutuk na’in-1.481, mai hosi suku lima (5) dadús veliche na’in-1.458 no invalidéz na’in-23 ho totál valór pagamentu hamutuk $506,874.00.
Iha sub-rejiaun Oésilo totál benefisiáriu 1.609, iha suku tolu (3), dadús veliche na’in-1.578 no invalidéz na’in-31 ho valór pagamentu $552,078.00.
Iha sub-rejiaun Pante Makasar iha suku ualu (8) ho totál benefisiáriu hamutuk na’in-3.333, dadús veliche na’in-3.260 no invalidéz na’in-73 ho valór pagamentu hamutuk $1,146,729.00.
Iha sub-rejiaun Pássabe iha suku rua (2) ho totál benefisiáriu hamutuk na’in-795, veliche na’in-791 no inavlidéz na’in-haat (4) ho valór pagamentu hamutuk $271,890.00.
“Pagamentu faze dahuluk 2023 iha Oé-Cusse sei hahú iha segunda semana oin, loron 14 agostu hahú uluk iha suku Malelat, sub-rejiaun Pássabe, tuir mai Oésilo no Nítibe, ikusliu iha Pante Makasar, tanba data ikus ba pagamentu ne’e iha 09 outubru 2023 ne’e,” Albano de Jesus Maniquim, relata ba jornalista sira iha Oé-Cusse, kinta ne’e.
Nia akresenta, dadus ba benefisiariu sira iha mudansa tanba balu mate ona, iha 2022 benefisiáriu hamutuk 7.343, maibé agora iha faze primeiru 2023 hamutuk 7.218, dadus ne’e menus tanba foin daudaun ne’e, parte INSS halo kontajen iha dadus mate hamutuk na’in-125.
Koordenadór INSS ne’e informa, daudaun ne’e INSS halo ona koordenasaun ho parte autoridade lokál sira, envia tiha ona orariu pagamentu ba banku BNCTL hodi integra mai iha INSS hodi distribui kada suku sira
“Maibé fatin ba pagamentu laiha mudansa ho tinan hirak ba kotuk, benefisiáriu sira sei konsegra iha sede suku ida-idak atu asesu sira-nia direitu ne’e,” nia katak.
Tuir nia, karik benefisiáriu, ne’ebé labele asesu ba sentru pagamentu tanba moras, nia kritéria ne’e, entrega ona tiha ona ba suku sira, katak sei halo deklarasaun ida, família ka oan bele reprezenta hodi asesu direitu ne’e.
“Tanba durante pagamentu ne’e la’o, ofisiál tékniku sira sei hetan akompañamentu hosi PNTL atu asegura sentru pagamentu, tanba benefisiáriu sira maioria idade ona ba ferik ho katuas, nune’e prosesu pagamentu ne’e bele la’o ho susesu,” nia afirma.
Notísia relevante: “PR promulga programa IX Governu mak realiza pagamentu ba idozu-Invalidéz”
Jornalista: Abílio Elo Nini
Editor: Evaristo Soares Martins
